El gobiernu va instalar dos oficines de promoción de la fala eonaviega

La Conseyería de Cultura prepara la instalación de dos oficines de promoción del gallegu-asturianu o fala occidental nel Navia-Eo. El proyectu adelantólu ayeri la directora xeneral de Promoción Cutlural y Política Llingüística, Consuelo Vega Díaz. Caún d'esos puntos llingüísticos ta pensáu pa les comarques de Os Ozcos-Eo y del parque Históricu del Navia, anque tovía nun se definió la so llocalización concreta.

La responsable de Política Llingüística esplicó qu'esti par de servicios de promoción va contar cola xerencia d'un responsable que va encargase d'atender les diferentes necesidaes sobre la normalización llingüística. Dende ellí van organizase esposiciones y tamién van prestase un serviciu pa la realización de traducción de documentos.

"Van ser tamién mediadores de proximidá de la conseyería", indicó Vega Díaz.

Los puntos de normalización llingüística, los primeros d'Asturies específicamente dedicaos al gallegu-asturianu, anque ye existen n'otros puntos de la rexón, nun son la única iniciativa novedosa en relación con esta variante del asturianu. La directora xeneral de Promoción Cultural tamién avanzó que'l próximu añu, "y en tolos casos nunca enantes del branu", ta pensada la celebración d'un primer congresu d'escritores de fala.

"Sobre tou n'asturianu foron organizándose dellos congresos con una periodicidá bianual nos que participaben escritores de toa Asturies, pero la fala tien una personalidá bien destacable pa face-y un congresu n'esclusiva", indicó la responsable rexonal Vega Díaz, quien tamién señaló a esti respecto la calidá y cantidá d'escritores en fala.

La directora xeneral de Promoción Cultural y Política Llingüística amás manifestó comprender la existencia d'un esmolecimientu respecto al futuru del gallegu-asturianu na comarca, porque "tamién pasa con llingües como la gallega, la vasca y hasta la catalana, anque nun mos lo paeza pola so presencia pública". Sin embargu, considero respecto a la fala que "la suerte ye que ta mui arraigonada y permanez mui viva na sociedá".