El Gobiernu va declarar BIC el pozu La Rebaldana de Turón

El Gobiernu tien intención d'entamar a últimos del mes de xineru qu'entra l'espediente pa la declaración de Bien d'Interés Cultural (BIC) del pozu mineru de Santa Bárbola o pozu la Rebaldana en Turón (Mieres) una instalación que data de la década de 1920. En pasando tolos trámites, que se fadrán nel primer trimestre del 2008, el Ministeriu de Cultura tendrá vía llibre pa invertir "los 200.000 euros" que-y correspuenden a esta actuación nel añu 2008, anque les actuaciones pa la recuperación del patrimoniu mineru nel valle de Turón tienen acutáu un millón d'euros d'equí al 2010. El plan previstu pal valle inclúi la creación d'un ferrocarril mineru ente los pozos de San Xosé, La Rebaldana y el Pozu Espinos, y la recuperación de toos estos pozos.

Turón, que desarrolló una gran actividá minera dende l'últimu terciu del sieglu XIX y hasta la crisis de los años 70, foi un gran noyu carboneru qu'apurría la so producción a Altos Hornos de Vizcaya, empresa qu'acaparaba tola producción del valle pa llevalo hasta les fábriques vasques. La desapaición de la minería arrastró con ella más de 6.000 puestos de trabayu. Na década presente yá s'entamaren acciones de recuperación del so patrimoniu, casu de la restauración del castillete de Pozu Espinos, únicu pola so tipoloxía, y la reconversión de parte de la caxa del tren mineru en camín andariegu. El Pozu San José y el Pozu Figareo, que data de 1860 y foi lúltimu en pesllar, completen esti valle mineru estráu de vivienda obrera y edificios rellacionaos cola actividá del carbón.