El Gobiernu va decidir la selmana qu’entra si acude al Fondu de Liquidez Autonómica

Javier Fernández anunció esti martes na so intervención nel Debate d’Orientación Política que la selmana qu’entra va tomar la decisión d’acudir o non al Fondu de Liquidez Autonómica. Asegura qu’esisten ufiertes d’entidaes financieres.

El presidente del país remarcó que va ser na selmana próxima cuando’l Gobiernu va tar en condiciones de precisar la composición y les condiciones de financiamientu de los 423 millones d'euros de creitu estraordinariu comprometíu. Indicó que l'Executivu cuenta yá con "importantes ufiertes en firme de delles entidaes financieres”, mentes qu'otros bancos tán a la espera de conocer los detalles esactos del Fondu de Liquidez Autonómica (FLA) pa plantegar la so propuesta. Na so intervención na Xunta Xeneral tamién destacó que na so recién entrevista con Mariano Rajoy, presidente del Gobiernu estatal, tresmitió-y el so desalcuerdu cola actuación del Executivu en cuanto al FLA, yá que recordó que'l mesmu ta escurríu p’alliviar a les comunidaes más insolventes. "El Fondu non sólo penaliza a Asturies, al discriminala frente a les comunidaes más insolventes, amás retrae recursos del mercáu", dixo Fernández, que recordó que tres l’autorización de la Xunta del endeldamientu de 423 millones p'acometer inversiones previstes nel Plan Económicu Financieru, púnxose a trabayar pa llograr el mayor financiamientu, pero la demoranza del Gobiernu estatal en definir el Fondu enzancaron esi trabayu.

Dientro del ámbitu de Facienda recordó que'l Plan Económicu Financieru tamién preve amenorgar el sector públicu al traviés de dos lleis; la primera presentaráse la selmana próxima y l'otra nel primer semestre del exerciciu próximu. Asina, na primera establécense conteníos como la supresión del Institutu Asturianu d'Estadística; la xunificación de la Sociedad Regional de Turismo y de la sociedá RECREA; la xuntura nuna sola direición de les entidaes del 112 y Bomberos d'Asturies; o la enayenadura de la participación del Principáu en SEDES, ente otros conteníos. La ellaboración d'una llei del Sector Públicu va completar el diseñu. Al respeuto, pidió a la oposición que fuxa de la demagoxa y aseguró que los axustes que se preparan tán forzaos pola austeridá, pero tienen la llende de la eficiencia. "Nun vamos regalar los oyíos a naide con midíes que depués se traduzan nun peor serviciu", dixo.