El Gobiernu torna a destinar 2,6 millones a ayudes pa proyeutos de cooperación al desarrollu

La convocatoria de subvenciones pa proyeutos de cooperación al desarrollu impulsaos por entidaes con sede nel país cuenta con una partida de 2.560.000 euros. Estes ayudes permitieron entamar nos dos últimos años 64 iniciatives, con una cuantía de 4,9 millones.

El Gobiernu va primar, en concreto, iniciatives venceyaes a países con baxos índices de desarrollu y aquelles definíes como prioritaries nel V Plan Direutor de Cooperación pa consiguir un mayor impautu de l’ayuda, gracies al criteriu de concentración en zones d'especial interés. L’añu pasáu destináronse al mesmu fin 2.530.000 euros.

Asturies foi pionera n'empobinar les ayudes a aiciones que favorecen el llabor de les organizaciones de muyeres o que promueven la igualdá de xéneru, para les que'l plan direutor acuta un mínimu del 10 por cientu de los fondos. Nel 2017, les iniciatives d’empoderamientu y meyora de les condiciones de vida de les muyeres recibieron el 31,14 por cientu de los fondos y constituyeron el principal sector d'intervención de la cooperación asturiana, con una inversión de 735.180 euros.

Per árees xeográfiques, el 45,04 por cientu de los programes subvencionaos l'añu pasáu punxéronse en marcha en Centroamérica y Caribe, onde Nicaragua, con 310.500 euros, foi'l país que concentró'l porcentaxe d'ayuda más eleváu, siguíu per Colombia y Guatemala. Cerca del 54 por cientu de los proyeutos qu’algamaron ayudes nos dos años últimos dirixóse a midíes diseñaes para garantizar los derechos económicos, sociales y culturales de países en desarrollu, sobre manera n'árees como la educación, la salú, la vivienda, l'agua, el saneamientu y la soberanía alimentaria.