El Gobiernu subastará por 100 euros a los asturcones del Monte Cayón

La decisión del Conceyu de Piloña de dedicar el Monte Cayón pa pastos ganaderos lleva a Agroganadería a subastar los asturcones del llugar por 100 euros caún. “Güei son los asturcones, tolos díis ye Asturies”, afirma Andecha Astur.

Doce femes y ocho machos que viven nun terrén controláu pola Asociación de Criadores de Ponis de Raza Asturcón (ACPRA) van poneses a subasta por un preciu de salida de 100 euros el 23 d’abril, a les 18 hores, nel Edificiu Alministrativu de Servicios Múltiples (EASMU) d’Uviéu. La razón ye la decisión del Conceyu de Piloña de dedicar l’espaciu ocupáu dende va 25 años por esta raza autóctona nel Monte Cayón a pastos ganaderos tres finar l’añu pasáu’l conveniu robláu pol ayuntamientu y la conseyería con ACPRA. “Dende l’Asociación tratóse d’impulsar la renovación de dichu conveniu, recibiendo una negativa rotunda por parte de les autoridaes municipales, escusándose nel pidimientu de la Xunta Ganadera llocal pa facer usu d’esi terrén”, esplica’l coleutivu de criadores.

Les xestiones entamaes cola alcaldesa, la socialista Carmen Barrera, pa que los asturcones pasaran d’ocupar les 120 hectárees actuales a 30, “superficie mínima indispensable onde s’inclúin les infraestructuras”, tampoco llegaron a bon puertu, un “refugu aceptáu de forma pasiva por parte de la conseyería”. ACPRA tien entamada una campaña dende finales del 2012 na web change.org pa recoyer firmes coles que presionar al Conceyu de Piloña pa que rectifique y caltener asina a los asturcones nel so espaciu del Monte Cayón.

Crítiques a les politiques del Gobiernu con tolo asturiano

Andecha Astur, formación que propunxera “la recuperanza de los terrenos contaminaos polos ocalitales” nel Monte Cayón pa permitir la permanencia de los asturcones nel llugar, critica la postura d’Agroganadería y del Conceyu de Piloña y entiende qu’esta negativa a buscar soluciones “reflexa toda una filosofía de la que s’estrái que pa esti Gobiernu tolo asturiano tien valor de saldu”. Los nacionalistes denuncien esti fechu “non sólo pola gravedá que representa pa la pervivencia d’esta especie autóctona asturiana en pelligru de desaniciu, sinón tamién no que tien d’espresión de les polítiques del ‘Principado’ escontra Asturies y tolo asturiano, que lu lleven a despreciar y a desatendese, cuandu non a persiguir, toles espresiones de la nuesa identidá, seya nel planu llingüísticu, cultural o medioambiental, o al mesmu texíu sociu-económicu que da soporte al nuesu pueblu”.

Respeuto al Conceyu de Piloña, tamién en manes de la FSA-PSOE, la organización llamenta que mientres desalluga a los asturcones “gasta dende va dellos años munchos miles d’euros na defensa del patrimoniu cultural andaluz coles sos exhibiciones de caballos andaluces, concursos d’engalanáu de casetes andaluces, traxes de faralaes y mises rocieres na llamada ‘Feria d’Abril’, que ye l’actu cultural más importante del conceyu”.