El Gobiernu solicita al Senáu la convocatoria urxente de la comisión sobre la situación del sistema de la dependencia

Asturies ye ún de los territorios que tán acabantes de solicitar al Senáu la convocatoria urxente y estraordinaria de la comisión xeneral de les comunidaes autónomes pa encarar la situación actual del sistema de la dependencia y reclamar una meyora de la so financiación. Reivindica un pautu d’Estáu pa garantizar la sostenibilidá de l'atención a les persones dependientes.

Andalucía, Castilla-La Mancha y Extremadura coinciden con Asturies en que dicha comisión “pue ser un espaciu bonu pa la reflexón y el diálogu, nel que les distintes alministraciones aproximen posiciones sobre'l funcionamientu y financiación de la Llei de la Dependencia, dende'l respetu, el rigor y la defensa de los derechos de la ciudadanía”, según esplica un comunicáu del Gobiernu. Ente otros temes, les autonomíes quieren analizar nesti contestu les consecuencies de les midíes de retayu aplicaes pol Gobiernu de Mariano Rajoy dende’l 2012 y reflexaes en Real Decretu-Llei 20/2011, de 30 d'avientu, de Midíes Urxentes en Materia Presupuestaria, Tributaria y Financiera pa la corrección del déficit públicu; el Real Decretu-Llei 20/2012, de 13 de xunetu, de Midíes pa garantizar la Estabilidá Presupuestaria y de Fomentu de la Competitividá, y nos Presupuestos Xenerales del Estáu.

Asina mesmo, pretenden que s'estudie la posibilidá de llevantar la suspensión del nivel de proteición alcordáu con efeutos retroactivos dende l'exerciciu 2012 y restablecer el nivel mínimu vixente primero de los retayos. La perda del nivel de proteición alcordáu, una cantidá fixa qu'aporta l'Estáu a les comunidaes en función de parámetros como la población, el nivel de renta, etc., xunto col amenorgamientu del 13 por cientu del nivel mínimu, cantidá qu'aporta l'Estáu per cada dependiente, supunxeron p'Asturies una mengua d'ingresos d'unos 40 millones nos trés exercicios últimos (2013, 2014 y 2015).

L’Executivu, pente medies de la conseyera de Servicios y Derechos Sociales, reivindicó en bien d’ocasiones la necesidá de revisar la Llei de la Dependencia, depués de diez años en vixencia, y llograr un pautu d'Estáu nesta materia que garantice'l funcionamientu del sistema y asegure la so sostenibilidá, yá que l'aportación económica media de les comunidaes llega yá al 82 por cientu frente al 18 por cientu de financiación estatal. Anguaño, Asturies atiende a más de 19.000 dependientes.