El Gobiernu recupera la campaña de matriculación en Llingua Asturiana y Gallego-asturiano

La Conseyería d'Educación y Cultura recuperó esti llunes una campaña informativa pa promover la matriculación en Llingua Asturiana y Gallego-asturiano. Ésta, que nun se facía dende'l 2013, usa'l lema 'Yo apúntome, piensa en futuru, piensa n’asturianu'  y 'Eu apúntome, pensa en futuro, pensa en gallego-asturiano'.

Dende güei tolos centros públicos y concertaos de Primaria, Secundaria y Bachilleratu van mostrar los cartelos de la campaña y van repartir los dípticos preparaos pa la campaña, que tamién se pueden descargar de la web Educastur o al final d'esta propia noticia. Éstos inclúin información sobres les ventayes de dar llingua asturiana o gallego-asturiano, con declaraciones de profesionales de prestixu emponderando'l multillingüismu.

Cola entrada de la LOMCE en Primaria, los alumnos han d'escoyer ente Llingua Asturiana y Lliteratura o Cultura Asturiana, mentes qu'en Secundaria y Bachilleratu ye una optativa que compite con otros idiomes estranxeros. L'enseñu de la llingua asturiana empezó a impartise oficialmente nel 1984 en diez centros educativos públicos, que foron aumentando nos años socesivos. Na actualidá imparten enseñances de llingua asturiana y gallego-asturianu en 335 centros educativos.