El Gobiernu reconoz “el llabor de la xente de la música en favor de la normalización llingüística” dedicando-y la XL Selmana de les Lletres Asturianes

La XL Selmana de les Lletres Asturianes va homenaxar a la música asturiana de los 40 años postreros. “El llabor de la xente de la música en favor de la normalización llingüística ye un fechu destacable que merez el reconocimientu institucional y popular”, afirma la Conseyería d’Educación y Cultura.

Depués de dedicar la edición anterior a la lliteratura infantil y xuvenil, el Gobiernu quier poner esti añu’l focu, na cuarentena edición de la Selmana de les Lletres Asturianes, na música del país en llingua asturiana y gallego-asturiano. Col Día de les Lletres Asturianes, el 3 de mayu, como exa central, la celebración va comenzar el día 26 d’esti mes a les 7 hores col Alba de les Lletres Asturianes, en Llorgozana tres la esitosa esperiencia del añu pasáu, allargándose hasta’l 9 de mayu con actos per toda Asturies.

Los oficiales van centrase en Ribeseya, Siero, Uviéu, Corvera, Grau, Xixón, Avilés y Tapia, cola participación d’instituciones y asociaciones como la Xunta Xeneral, l’Institutu Asturianu de la Muyer y Polítiques de Mocedá, la Fundación Aula de les Metáfores, Llaboral Ciudá de la Cultura y los ayuntamientos qu’acueyen dichos actos. Per primer vegada, inclúise la gala del Premiu al Meyor Cantar dientro la Selmana de les Lletres Asturianes, prevista nel Teatru Nuevu de La Felguera’l vienres 26 a les 20 hores.

CD conmemorativu

A diferencia d’otres ediciones, nesta ocasión nun va haber un llibru conmemorativu de la Selmana, sinón un CD. Ésti va incluyir 40 cantares representantivos de la historia de la música n’asturianu y gallego-asturiano y va poder algamase nel Día de les Lletres Asturianes al mercar un discu o llibru nestes llingües, col tradicional descuentu del 10 por cientu nel preciu al celebrase nesa xornada tamién el Día del Llibru Asturianu.

Na semeya, un momentu de l'actuación de Dixebra esti avientu nel conciertu de fin de xira pol trentenu aniversariu de la banda celebráu na uviedina sala Tribeca, que quedó pequeña pa la ocasión.