El Gobiernu quier recuperar la inversión pública fecha na cartográfica Venturo XXI

La ‘Sociedad Regional de Promoción’ d’Asturies presentó una querella criminal sobre los promotores privaos de Venturo XXI. El conseyeru d’Industria, Graciano Torre, señaló que l’oxetivu ye recuperar la inversión pública.
 
"Entabláronse actuaciones xudiciales pa recuperar tolos valores d'aiciones y préstamos, y hasta hai una querella criminal, de la que nun puedo informar agora. Ta too reclamao y confiamos en que la xusticia s'aplique", dixo Graciano Torre esti martes na comisión de la Xunta Xeneral. Esta querella va contra los hermanos José Antonio y Manuel Coronado, propietarios del 51 por cientu de la empresa, que ta en procesu concursal –el resto ta en manes de capital públicu cola presencia de Sadim nun 21 por cientu; la ‘Sociedá Regional de Promoción’, n'otru 21; y la Sociedá pal Desarrollu de les Comarques Mineres, nun 7 por cientu–."Trátase d'intentar recuperar el dineru invertíu per tolos medios llegales posibles. Esiximos, por tanto, que los bienes de los hermanos Coronado nun desapaezan y que valgan pa pagar lo que deben a la ‘Sociedad Regional de Promoción’", añade’l conseyeru.
 
Torre compareció esti martes nel Parlamentu a pidimientu del PP pa dar cuenta de tolo rellacionao cola sociedá Venturo XXI, la marcha del so procesu concursal y n'especial pa que diera llectura completa del informe provisional emitíu polos alministradores concursales según del informe definitivu. La empresa cartográfica recibió 1,2 millones d’euros de los fondos mineros pa instalase n’Asturies, amás d’otres ayudes económiques millonaries, y cuenta con una deuda de más de 5 millones d’euros.