El Gobiernu quier facilitar l’accesu a l’agricultura a 155 mozos

|
 María Jesús Álvarez González y Valeriano Remis nel XXXI Concursu y Puya de la Raza Asturiana del Monte

La Conseyería de Desarrollu Rural y Recursos Naturales va destinar 3.875.000 euros al apoyu a la primer instalación a 155 mozos y moces llabradores. Tamién va crear una partida de 5.579.693 euros a 174 proyeutos de modernización d'esplotaciones ganaderes.

La conseyera María Jesús Álvarez González facilitó ayeri en Cangues d’Onís estos datos na clausura del XXXI Concursu y Puya de la Raza Asturiana del Monte. Con estes ayudes, recoyíes nel Programa de Desarrollu Rural d'Asturies (PDR) 2014-2020, qu’ascienden a 9,4 millones, búscase ameyorar el rendimientu económicu de les esplotaciones per aciu un usu más afayadizu de los preseos de producción, favorecer la innovación y les nueves teunoloxíes, y facilitar l'accesu de los mozos al emplegu nel mediu rural.

“Esti esfuerciu económicu demuestra'l compromisu del Principáu col fomentu del relevu xeneracional y la meyora de la competitividá de les esplotaciones agrícoles y ganaderes pa garantizar la supervivencia del sector y contribuyir al caltenimientu del equilibriu territorial”, añadió. Álvarez González recordó tamién que l’añu qu’entra va doblase l'importe de les ayudes individuales pa la incorporación de mozos, que va xubir de 25.000 a 50.000 euros.

Esi aumentu va producise tres el cambiu del PDR, que va reorientar el gastu financieru de 57 millones del Fondu Européu Agrícola de Desarrollu Rural (Feader) y afeuta a un presupuestu públicu total de 81 millones.

25.640 vaques casines

La conseyería destina anguaño 149.900 euros a l'Asociación Española de Criadores de Ganado Vacuno Selecto de Raza Asturiana de la Montaña (ASEAMO) p'ayudar a caltener el llibru xenealóxicu, el desenvolvimientu de los programes de caltenimientu y la promoción d'esta raza, tamién denominada casina. 20.800 exemplares de 640 criadores figuren inscritos en dichu llibru xenealóxicu, “lo que pon de manifiestu que l'esfuerciu de los criadores, col sofitu del Principáu, ta dando resultaos na recuperación d'un animal perbién adaptáu al terrén y con carauterístiques singulares que, amás, forma parte de la IXP Ternera de Asturias”, destacó Álvarez González.

El censu total d'animales bovinos de la raza casina nel país ye de 25.640, ente que’l xeneral de vaques n'Asturies asítiase en 373.802 reses.

Na semeya, Álvarez González y Valeriano Remis, presidene d'ASEAMO, ente vaques casines.

Contador Estadistiques