El Gobiernu prevé subir el salariu mínimu perbaxo del IPC

El Gobiernu va aumentar el salariu mínimu interprofesional (SMI) "en llinia" cola subida aplicada nel 2010, que foi del 1,5%, o hasta perbaxo. El máximu sedrá de 642,79 euros mensuales dende los 633,30 euros actuales.

Esta subida va suponer una pérdida de poder adquisitivu pa los trabayadores, que previsiblemente van tener que soportar el próximu añu una subida del IPC nel entornu del 1,7%, según los analistes.
  
Asina, la Fundación de les Caxes d'Aforru (Funcas) prevé una subida de los precios del 1,8% nel próximu añu, mientres que'l BBVA estima que va ser del 1,7%.
  
Esti efectu yá se produxo nel 2010. Si'l salariu mínimu s'elevó un 1,5% dende'l mes de xineru, la tasa d'IPC yá crez al 2,3% y no que va d'añu fízolo nun 1,8%.
  
Les fontes consultaes aseguraron que tovía nun hai una cifra definitiva, polo que nun confirmaron si la subida del SMI va implicar un deterioru del poder de compra de los trabayadores.

Amás, la revalorización de les pensiones prevista pal 2011 nos Presupuestos Xenerales del Estáu (PXE), que da la midida de la previsión d'IPC del Executivu, ye del 1%.
  
Nun conxela
Les mesmes fontes dexaron claro que l'Executivu "nun va conxelar" el salariu mínimu interprofesional, como se fizo coles pensiones. De facelo, supondría un nuevu alloñamientu del Gobiernu de Zapatero de la so política social y un nuevu puntu d'engarrada colos sindicatos.