El Gobiernu pide ordenadores en desusu p’actualizalos y repartilos a escolinos que nun tengan

La Conseyería de Ciencia, Innovación y Universidá entama una campaña de recoyida d'ordenadores y tabletes vieyes pa que puedan ser reutilizaos por families con escolares que nun disponen de medios teunolóxicos. Éstos van ser actualizaos pa facelos llegar darréu a los 3.000 llares que nun cuenten con estos dispositivos.

“El motivu de la campaña ye intentar aportar. Trátase de recoyer equipos informátivos d’empreses y particulares a los que se-yos pueda dar una vida nueva”, esplica Iván Aitor Lucas del Amo, direutor xeneral d’Innovación, Investigación y Trensformación Dixital. El primer pasu foi contautar con empreses del sector de les teunoloxíes de la información y les comunicaciones (TIC) y cola Federación Asturiana de Conceyos (FACC) pa organizar la recoyida y distribución de dispositivos.

L'oxetivu ye doble: ayudar a les families con fíos y fíes n'edá escolar pa que nun pierdan el cursu por falta de recursos –collaborando d'esta forma cola Conseyería d'Educación– y, al empar, tratar de poner fin a la fienda dixital y qu’eses families dispongan, cuando acabe la pandemia, de los recursos teunolóxicos necesarios. Los datos últimos facilitaos pol departamente de Carmen Suárez Suárez rescamplen que 6.000 escolares nun tienen conexón a Internet y que 3.000 nun cuenten ordenador.

La FACC va collaborar convirtiendo los conceyos en puntos de recoyida y distribución del material informático que se consiga. Tamién va participar la Conseyería de Derechos Sociales y Bienestar, de forma que se garantice que les donaciones lleguen a les families que más lo precisen.

Como tercer puntu de sofitu fundamental, la Direición Xeneral d'Innovación contautó cola comunidá de voluntarios profesionales del ámbitu informáticu que van ayudar a preparar los ordenadores y tabletes pa da-yos un segundu usu. Esta iniciativa va estendese tamién a particulares que deseen entregar dispositivos que yá nun utilicen, siempre que sólo se necesite una puesta a puntu pa poder aprovechalos, pa lo que se facilita la direición de corréu electrónicu cienciacovid19@asturias.org.

Na semeya, Lucas del Amo esplica los detalles de la campaña dende'l so llar.