El Gobiernu pide a Rajoy “soluciones” pa la minería del carbón

Guillermo Martínez, voceru del Gobiernu, pidió de forma pública “soluciones” a Mariano Rajoy pal caltenimientu de l’actividá minera. L’Executivu almite que sigue con “preocupación” el conflictu xeneráu pola mengua nes ayudes al carbón.
 
"Nós tamos del llau de les families asturianes afeutaes de manera más direuta pol axuste mineru, y de los ciudadanos de les cuenques", sorrayó Martínez tres la reunión del Conseyu de Gobiernu. El voceru reiteró'l "refugu" del Executivu asturianu al recorte del 64 por cientu neses ayudes a la esplotación minera, incluyíu nos Presupuestos Xenerales del Estáu. Según Martínez, fixéronse de forma unillateral, poniendo fin a un modelu de negociación y d'alcuerdos que funcionara con gobiernos de signos distintos.
 
Güei continuaron n’Asturies los cortes entamaos polos mineros en dellos puntos de rede pública de carreteres d’Asturies, anque les aiciones con más repercusión afeutaron al tráficu per ferrocarril. A les 11.45 hores, los trabayadores valtaron un árbol sobre la vía al altor de Fierros, impidiendo asina’l pasu de dos Alvias con 89 y 125 caún. Pela tarde, a les 18.15 hores, hubo un corte nuevu, tamién en Ḷḷena, ente Ḷḷinares y Navidiiḷḷu. Los pasaxeros tuvieron que desplazase n’autocar pese a la fuelga indefenía nel tresporte per carretera.