El Gobiernu obliga a rexistrar a los veceros de dellos negocios, como peluqueríes o ximnasios

El BOPA espublizó un suplementu na tarde del miércoles coles decisiones adoptaes nel Conseyu de Gobiernu pa frenar l’espardimientu del coronavirus SARS-CoV-2, enfocaes principalmente al ociu nocherniegu. La resolución obliga tamién a rexistrar a los veceros de dellos negocios, como peluqueríes o ximnasios, anque pa la hostelería namái lo recomienda.

A les midíes yá anunciaes pol presidente Adrián Barbón tres la xunta, esto ye’l pieslle de la barra de los chigres a la medianueche y el determín de trancar a les 2 de la madrugada tola hostelería, sumáse la obligatoriedá a dellos tipos de negociu de rexistrar a los sos veceros. Nel testu, que modifica la resolución de “midíes urxentes de prevención, contención y coordinación necesaries pa facer frente a la crisis sanitaria ocasionada pola COVID-19” del 19 de xunu, cita de manera espresa a “hoteles, albergues y otros agospios turísticos, peluqueríes, barberíes, centros de guapura, gabinetes d’estética, salones de manicura, pedicura y depilación, saunes, balnearios, spas y ximnasios”.

Los sos propietarios deberán de guardar per un mes los datos del cliente, esto ye, nome y apellíos y teléfonu de contauto, xunto cola fecha y hora del acceso y de salida. Munchos d’estos negocios, al funcionar con cita previa, yá veníen tomando los teléfonos y nome de los veceros, anque otros deberán empezar a facelo.

La hostelería va llibrar de momento esti trámite porque “hai dificultaes añadíes si nun hai ánimu collaborador por parte del sector hosteleru”, esplicó Barbón, que señaló que los servicios xurídicos del Gobiernu tán estudiando’l so encaxe llegal. Poro, la resolución namái “recomienda l’adopción de sistemes de rexistru asemeyaes” a los chigres y discoteques.