“El Gobiernu nun tien un enfotu real a la hora de facilitar que toos y toes miremos pol nuestru patrimoniu”, afirma la Fundación Belenos

Espublizóse recién nel BOPA la convocatoria d’ayudes pal remocique d’horros, paneres, cabazos o molinos, ente otros elementos del patrimoniu cultural d'Asturies. La Fundación Belenos llamenta que “el Gobiernu asturianu nun tien un enfotu real a la hora de facilitar que toos y toes miremos pol nuesu patrimoniu”.

El martes diéronse a conocer los datos de la convocatoria de subvenciones, con una dotación de 100.000 euros. Daniel Cueli, representante de la Fundación Belenos, considera que se trata d’una cantidá “mui ruina si se tien en cuenta'l númberu d'elementos patrimoniales que pueden ser remocicaos con cargu a la subvención y, poro, el númberu de solicitúes que pueden llegar a presentase”.

Critica tamién los plazos qu’afita la resolución de la Conseyería d’Educación y Cultura, yá que “non sólo se dan namás que venti díes naturales pa presentar la documentación afayadiza pa solicitar subvención, sinón que l'ayuda económica ha de tar xustificada a 31 d'ochobre y, por tanto, la obra fecha. Teniendo en cuenta que la Resolución de concesión, una vegada valoraes les solicitúes presentaes, pue tardar unos cuantos díes y de xuru que nun sal hasta finales de setiembre o entamos d'ochobre, resulta prácticamente imposible optar a estes ayudes a nun ser que la obra de remocique del elementu patrimonial en cuestión yá tea fecha a día de güei”, esplica Cueli.

“Esta cuestión, en cierta manera, ‘ayuda a solucionar’ el primeru de los problemes, el de les perres, y ye que con estes condiciones camentamos que se presentarán poques solicitúes”, apunten dende la Fundación Belenos. Esti coleutivu considera esta convocatoria una bona preba “de que'l Gobiernu asturianu nun tien un enfotu real a la hora de facilitar que toos y toes miremos pol nuestru patrimoniu, yá que lo mínimo sería convocar esta subvención a entamos d'añu, con un plazu mínimu de trenta díes hábiles pa poder solicitar –que ye lo avezao n'otres convocatories–, un tiempu curtiu pa valorar y resolver les solicitúes presentaes y un periodu más ampliu pa poder xustificar, que llegara polo menos hasta'l 30 de payares”.

Por último, considera que, “arriendes de los plazos, taría la cuestión de les perres, qu'evidentemente tendríen de ser munches más pa poder abarcar cuantos más elementos patrimoniales meyor”, una cifra qu’atalanten que debería ser de “un mínimo d'un millón d'euros al añu".