El Gobiernu niega exhumación o treslláu nel Valle de los Caídos

El Ministeriu de la Presidencia informó qu'ente los meses de mayu y setiembre realizó "prospecciones" nes criptes y osarios del Valle de los Caídos y puntualizó qu'en nengún momentu se fizo "nenguna exhumación nin treslláu".

Nun comunicáu, el departamentu que dirixe María Teresa Fernández de la Vega esplicó que "los estudios forenses tovía nun acabaron", y que, cuando llegue esi momentu, l'Executivu "va facer públiques les sos conclusiones", y daráles a los grupos parlamentarios y a les asociaciones y familiares que s'interesaron por esti asuntu.
  
Los estudios pretenden "comprobar l'estáu de los restos y la viabilidá de les exhumaciones" solicitaes por delles families de víctimes del franquismu enterraes ellí.
  
Presidencia señaló qu'esti exame forense entamóse "dientro d'un procedimientu alministrativu" nel marcu de les competencies de Patrimoniu Nacional, "que tien la responsabilidá del caltenimientu y conservación del Valle de los Caídos", y añadió que tal procedimientu ye públicu y que se dio información a la comunidá benedictina que reside nel complexu.
 
Pel momentu, el Gobiernu comunicó a les families que solicitaron sovenciones pa exhumar restos que'l monumentu nun ta en condiciones de dar entrada ellí a particulares, sinón que fai falta un trabayu previu documental --pa ellaborar un censu-- y forense.
 
 Asina, según l'Executivu, el so estudiu sobre'l Valle de los Caídos, tien delles partes, dao qu'amás de comprobar l'estáu de les foses dende'l puntu de vista forense y arquitectónicu, hai una parte "documental", que consiste en compilar y examinar tolos documentos de la época pa "determinar la distribución de los restos nos distintos osarios".
  
Llei de Memoria Histórica
Too ello enmárcase nel desarrollu de la Llei de Memoria Histórica --la llocalización y exhumación de desapecíos ye una de les prioridaes de les sovenciones otorgaes en virtú de la llei-- y al mandatu parlamentariu de la Comisión Constitucional del Congresu que, el 30 de setiembre del 2009, aprobó una proposición non de llei instando al Gobiernu a ellaborar un censu de persones enterraes nel Valle de los Caídos, a facilitar les exhumaciones, y "axilizar el treslláu de los restos mortales de les persones ellí enterraes", cuando lo pidan los sos familiares o los sos representantes.