El Gobiernu niega’l permisu pa construyir el centru de residuos peligrosos d’El Musel

El proyeutu de construcción del Centru de Tresferencia de Residuos, Almacenamientu de Productos Químicos y Terminal de Ferrocarril de Mercancíes Peligroses n'El Musel nun va salir alantre. El Gobiernu niega’l permisu a la empresa solicitante.

D’esta forma, nel muelle de la Osa namái se podrá trabayar con residuos non peligrosos, dexando pa prau una iniciativa criticada dende ámbitos ecoloxistes que pretendía acumular nesta zona del puertu ganada al mar materiales peligrosos pal mediu ambiente como aceites, llodu o dellos tóxicos. Llueu, éstos seríen valorizaos n’Asturies o esportaos. D’esta forma, Xixón convertiríase nun pasu continuu d’esti tipu de productos tan contaminantes.

El Gobiernu va treslladar güei la so decisión, que llega pese a que l’actividá yá tenía un informe favorable de la Comisión de Asuntos Ambientales del Principáu d’Asturies, al Conseyu del Puertu d’El Musel. Dende la Coordinadora Ecoloxista d’Asturies, coleutivu que presentó alegaciones al proyeutu, celebren esta decisión y esperen que tanto l’Executivu como’l Conceyu de Xixón “cumplan col principiu de prevención y seguridá nuna zona que yá ye mui peligrosa poles sos actividaes y pola proximidá a la población”.