El Gobiernu lleva gastaos 1,7 millones nos centenarios de Cuadonga

|
Web centenarios Cuadonga

La intención ye intensificar dende esti mes los eventos venceyaos a esta efeméride pa favorecer la desestacionalización turística.

El Gobiernu destinó hasta agora más de 1.700.000 euros a la organización y promoción de los centenarios en distintes aiciones, ente los que destaca la puesta en marcha d'una páxina web, que recibió más de 146.000 visites; el llanzamientu d’una campaña específica en redes sociales, con un algame que supera los 4,4 millones d’impautos; y el diseñu del pabellón d’Asturies na Feria Internacional de Muestres (FIDMA), pel que pasaron más de 38.000 persones. No que queda d'añu van aumentase les actuaciones cola fin de, una vegada pasaes les vacaciones de branu, potenciar la promoción de los 1.300 años del orixe del Reinu d'Asturies, y los 100 años de la coronación canónica de la Santina y de la creación del Parque Nacional de la Montaña de Covadonga nunos meses nos que baxa'l númberu de turistes que s'averen al país.

Ente les previstes destaquen una collaboración na producción de la serie en castellanu 'Los caminos a Covadonga', que TPA empezó a emitir esta selmana; la celebración d’un espectáculu de lluz y soníu, que consiste na proyeición d’un video mapping les dos últimes fines de selmana de setiembre sobre la fachada de la basílica de Cuadonga; la inclusión, dientro del programa de rutes turístiques 'Itinerarios por el patrimonio', d’un percorríu centráu nos centenarios nesti mes, n'ochobre y en payares. qu'inclúi la visita a Los Llagos, la Santa Cueva, la basílica de Cuadonga y Cangues d’Onís; la puesta en marcha, en collaboración cola Asociación de Hostelería y Turismo de Asturias (Otea), d’un productu turísticu y gastronómicu nuevu rellacionáu cola triple efeméride; y la esposición 'La imagen de un reino' nel Muséu de Cuadonga, col que collaboró’l Gobiernu na so restauración y montaxe. Otra manera, instalóse publicidá de la campaña 'Vuelve al paraíso' cola anuncia de los centenarios en Madrid, destacando la valla xigante que lluz la plaza Castilla dende hai una selmana y espacios nel metro, y va siguir en revistes especializaes de tirada estatal, prensa líder nos mercaos de proximidá, portales d’información xeneral y turística, y redes sociales.

Contador Estadistiques