El Gobiernu llega a un alcuerdu con Izquierda Xunida y UPyD sobre la Llei de Midíes Urxentes

Un alcuerdu ente’l Gobiernu y IX y UPyD va permitir l’aprobación de la Llei de Midíes Urxentes en materia de Personal, Tributaria y Presupuestaria. Ésta inclúi decisiones de recorte de gastu públicu pa cumplir l’oxetivu del déficit.

El voceru del grupu parllamentariu socialista, Fernando Lastra, aseguró que se llogró un pautu que ye bonu p'Asturies y que demuestra l'altu sen de la responsabilidá política que se tuvo "a la hora de consensuar". "Punxeron los intereses d'Asturies per delantre de cualquier otra cosa”, añadió en referencia a IX y UPyD.

Tamién amosaron la so satisfaición el coordinador de la coalición, Manuel Orviz, y el voceru del grupu parllamentariu, Ángel González, por un alcuerdu que permite algamar l'oxetivu de "nun aceptar fotocopies ampliaes de los recortes de Rajoy nin apretar tovía más la tuerca". "Lo que pretendíamos ye que se retiraren los axustes adicionales del Gobiernu del Principáu y ameyórense delles cuestiones pendientes", dixo Orviz, qu'indicó que'l so partíu dexó claro que nun apoyaría "nenguna fotocopia de los recortes del PP, lo que llevó al Gobiernu a retirar la llei" na Xunta Xeneral mentes la so tramitación parllamentaria.

En rueda de prensa, los dirixentes d'Izquierda Xunida (IX) esplicaron que nel acuerdu establezse que se retiren tolos axustes adicionales en materia d'educación y de sanidá, pero tamién l'aplicación d'un complementu nacional a les baxes, pudiendo llegar al 100 por cientu en trabayadores de baxa por enfermedá grave. Amás suspéndese l'autorización de prórrogues pa prollongar la edá de xubilación, una midida qu'afeuta a unos 100 trabayadores y que supón un aforru de dos millones d'euros que van destinase al emplegu de mozos. L'acuerdu establez tamién la retirada de los complementos d'altu cargu y de la paga estraordinaria a esos altos cargos. Dende la coalición esperen agora que la llei s'apruebe lo antes posible, dao que tien que tar en vixencia a fecha 31 d'avientu. Nesti sen, indicaron que ye probable que l'Executivu la lleve esta mesma selmana a Conseyu de Gobiernu.

Pela so parte, el diputáu d’Unión Progreso y Democracia (UPyD), Ignacio Prendes, calificó de "satisfactoriu" l'acuerdu col Executivu, dao que recueye "casi toles enmiendes parciales" que’l so partíu presentara. Aseguró que ye "importante" la equidá d'estes midíes, yá qu'afeuten a derechos, pero refugó qu'esti acuerdu "allane" la negociación pa los presupuestos y considerólu un asuntu "al marxe".

"Desapaecen cuestiones en materia educativa y sanitaria qu'obedecíen a convenios o alcuerdos que nun teníen de tener calter de llei. La incapacidá temporal de los funcionarios ameyórase hasta onde la Llei nacional lo permite. Sobre l'Impuestu de Patrimoniu, protexerá'l patrimoniu de los discapacitaos y la retirada de la paga estra va incluyir a los altos cargos, Conseyu de Gobiernu y personal direutivu del Principáu", esgranó Prendes.