El Gobiernu invierte nel ameyoramientu de viales en Gamonéu y nel conceyu de Castropol

Los barrios de Los Cuetos y Les Cuerries, en Gamonéu, van ver ameyoraos los sos accesos, afeutaos pol estáu del firme. El Gobiernu tamién reactiva los trabayos na carretera AS-22, nel conceyu de Castropol, ente les poblaciones de Samagán y Llagar, un proyeutu que taba paralizáu pola empresa axudicataria anterior.

Les obres de meyora a los accesos a Los Cuetos y Les Cuerries comenzaron la selmana pasada, con un plazu d’execución de trés meses y una inversión de 66.224 euros. Los trabayos consisten nel acondicionamientu y pavimentación de los dos ramales, d'un llargor total de 1.050 metros, que presentaben defeutos nel firme.En concreto, van reparase los baches y los fundimientos de la calzada y van llimpiase les cunetes para facilitar el drenaxe. Amás, va anovase la señalización horizontal y vertical d’estos barrios de Gamonéu.

Autorización pa reactivar la obra de l’AS-22

El Gobiernu autorizó tamién la contratación de les obres d'acondicionamientu del tramu entre Samagán y Llagar de la carretera AS-22 (A Veiga-Bual), nel conceyu de Castropol, con un presupuestu de 9.833.473 euros. La tramitación va realizase al traviés de procedimientu abiertu y va haber dellos criterios pa l'axudicación.

El Conseyu de Gobiernu alcordara'l pasáu día 26 rescindir el contratu cola anterior axudicataria del proyeutu, Corsán-Corviam Construcción, tres la decisión de la empresa de paralizar los trabayos ensin atender a los requerimientos realizaos dende l’Executivu pa la so continuación. El siguiente pasu foi l'autorización d'un gastu tresañal pa facer frente a la contratación nueva que se va distribuyir de la siguiente manera: 1.033.369 euros con cargu a los presupuestos del 2018, 4.487.536 nel 2019 y 4.312.567 nel 2020.

La intervención va incluyir l'acondicionamientu del tramu, cola ampliación de la plataforma, de manera que la seición de circulación sía similar a la del restu de la carretera y llograr asina meyores condiciones de seguridá. En concreto, la vía va enanchase hasta los siete metros, con dos carriles de 3,50 metros caún, y los correspondientes sobreanchos nes curves.

Amás, va regularizase'l firme, va ameyorase'l drenaxe y va anovase la señalización vertical. Tamién van acondicionase doce interseiciones de la vía con caminos llocales p'aumentar la so visibilidá y va construyise una estructura pal pasu sobre'l ríu Porcía.

Coles mesmes, y coles mires de garantizar la estabilidá de les turries que se van ver afeutaes poles obres, proyeutáronse cinco muries de contención, toes elles d'escollera. Pa cumplir cola normativa de barreres de seguridá, éstes instalaránse coles preceptives proteiciones pa motoristes ellí onde tea indicao.

Por último, l'impautu ambiental va correxise con midíes que consisten na hidrosema en turries y na revexetación con especies autóctones.