El gobiernu gallegu márcase como prioridá llegar a alcuerdos de política llingüística col d’Asturies

La promoción del gallegu nel esterior centra ún de los bloques de los "IX Encontros para a Normalización Lingüística" que se celebren güei en Santiago.

Más de 200 persones rellacionaes colos ámbitos de la normalización del gallegu participen güei na comunidá vecina nos "IX Encontros para a Normalización Lingüística" que se celebren na Escuela Gallega d'Alministración Pública. El Plan de Normalización sociollingüística del gallegu centra esta edición del alcuentru, qu'inauguró esta mesma mañana la nueva secretaria de política llingüística gallega, Marisol López. Na so intervención inaugural cola qu'entamaba l'alcuentru, Marisol López fizo un repás de lo que van ser les primeres prioridaes y actuaciones del so departamentu. Anque reconoció qu'hasta l'añu 2007 el gobiernu gallegu nun va tar en condiciones de da-y los presupuestos qu'ella quixere, López márcase oxetivos ambiciosos con vistes a reforzar el gallegu na so tierra pero tamién pretende facer un gran esfuerzu pola promoción del gallegu fuera de Galicia. En concreto, una de les midíes esplicitaes esta mañana por Marisol López nesti sentíu foi la "revisión del conveniu d'enseñu con Castilla y Lleón pol que se manden les clases d'enseñu de gallegu nel Bierzo Occidental y la consecución d'alcuerdos col gobiernu del Principáu d'Asturies".
Más información en Vieiros