El Gobiernu fai una declaración institucional sobre la situación de la variante de Payares

Reclama al Executivu estatal un calendariu que concrete plazos, carauterístiques téuniques y inversiones pa la obra, al tiempu que refuga atrasos nuevos na mesma.

El Gobiernu fixo ayeri una declaración institucional na qu'apura a Mariano Rajoy a finar la variante de Payares, refugando cualquier cambiu que retrase entá más l'inauguración d'una obra que s'anició hai 13 años. La postura del Executivu de Javier Fernández ye la de caltener l'anchu ibéricu nos túneles pa tener un tráficu mestu de viaxeros y mercancíes, mentes que Madrid apuesta, tres el pautu del PP con Foro, por instalar vía d'anchu internacional, lo que dexa'l pasu de mercancíes pola actual instalación ferroviaria de Payares.

La declaración institucional completa ye la siguiente:

• El Gobiernu del Principáu apura la conclusión de les obres de la variante ferroviaria de Payares nos términos y condiciones recoyíos na 'Alianza poles Infraestructures del Estáu qu’Asturies Precisa', que s’unvió tanto al presidente del Gobiernu d’España como al ministru de Fomentu.
• N’abril del 2017, 13 años depués d’empezar los trabayos, nun esiste siquiera una estimación pa la puesta en serviciu de, polo menos, el primeru de los dos túneles escavaos. Esta situación xeneró una frustración social notable na nuestra comunidá autónoma, alimentada tamién polos retrasos n’otres comunicaciones y el deterioru de les existentes. El Gobiernu d’Asturies considera inaceptable qu’esta inseguranza s’allargue. Por eso, reclama al Executivu del Estáu que se comprometa con un calendariu que, amás de los plazos, concrete característiques técniques y inversiones. Cola mesma lóxica, oponémonos a cualquier cambéu innecesariu que retrase entá más la infraestructura y regale sides pa caltenela na indefinición.
• La variante tien qu’ayudar al máximu posible al desenvolvimientu d’Asturies. P’algamar esti propósitu, ye imprescindible que dexe’l tráficu mestu de mercancíes y pasaxeros. Anguaño, esa condición namás se garantiza coles víes n’anchu ibéricu. Como reconoció’l Ministeriu de Fomentu, la instalación d’anchu internacional obligaría a les mercancíes a percorrer el trazáu actual per Payares y tarazaría, polo tanto, el potencial de la infraestructura pa fortalecer la capacidá y competitividá de los grandes puertos y industries del Principáu. Equivaldría a un espilfarru irresponsable de recursos nuna obra na que s’invirtieron más de 3.000 millones.
• La entrada en serviciu de la variante n’anchu ibéricu va suponer una rebaxa sustancial del tiempu de viaxe ente Asturies y Madrid (unos 48 minutos pa viaxeros). Modificar el proyectu pa instalar l’anchu internacional retrasaría dellos años la finalización de los trabayos empara d’una rebaxa insignificante (5 minutos) de la duración del trayectu.
• Por tolo anterior, el Gobiernu del Principáu opónse al cambiu del proyeutu propuestu por Foro, asumíu pol Partido Popular d’Asturies en virtú de la so coalición electoral y, al paecer, aceptáu pol Gobiernu d’España. Les razones, toes con plenu respaldu técnicu, son comprensibles:

1. Va retrasar la conclusión de la obra. Ye probable que la retrase dellos años.
2. Va encarecer los trabayos y va obligar a realizar inversiones complementaries pa caltener operativu’l trazáu per Payares, un tendíu obsoletu que va esixir desembolsos recurrentes.
3. Al torgar el pasu de les mercancíes, va constreñir el potencial de los puertos d’Avilés y El Musel, va dificultar la puesta en marcha de comunicaciones complementaries como l’Autopista del Mar, va amenorgar la competitividá industrial y, p'acabar, va llastrar el potencial económicu d’Asturies.
4. La rebaxa del tiempu de viaxe va ser insignificante en comparanza colos daños sociales y económicos mentaos.

• El Gobiernu del Principáu solicitó reuniones pa tratar esta cuestión tanto al ministru de Fomentu como al presidente del Gobiernu d’España. Volvemos demandar qu’esos alcuentros se celebren cuanto primero pa quitar de que se consume esti despropósitu y s’atiendan los intereses d’Asturies. Resultaría incomprensible qu’una obra descomanada d’inxeniería se ponga al serviciu de da-y gustu a caprichos y obsesiones particulares en cuenta d’atender a la racionalidá técnica, el provechu económicu, la meyora de les comunicaciones y l’interés xeneral.

N'Asturies.com dedicamos el nuesu 'Conceyu Abiertu' selmanal a esta cuestión. Pues dar la to opinión calcando equí.