El Gobiernu estatal reconoz la vixencia de la “Región Leonesa”

El Colleutivu Ciudadanos del Reino de Llión (CCRL) celebra’l reconocimientu de la “Región Leonesa” por parte del Gobiernu estatal nuna respuesta escrita al senador valencianu Carles Mulet. Destaca que s’evite eufemismos pa referise al territoriu que conformen Lleón, Zamora y Salamanca.

“Dicir ‘Región Leonesa’ nun ye usar un términu políticu, sinón histórico-xeográficu; ye referise a la parte lleonesa de la comunidá autónoma de Castilla y Lleón, y el so usu nun implica necesariamente que se tea a favor de que se conforme n’autonomía propia”, esplica esti coleutivu que reivindica la identidá lleonesa. Especialmente críticu s’amuesa cola Junta de Castilla y Lleón por evitar citar esti territoriu, emplegando pa ello eufemismos como “oeste de Castilla y León”.

Una entruga del CCRL plantegada al traviés de Mulet, senador de Compromís comprometíu tamién cola llingua asturlleonesa, sobre los bienes procedentes de Salamanca, Zamora y Lleón que poseen los museos estatales, traxeron la respuesta lliteral del Executivu “la Región Leonesa (incluye las provincias de Salamanca, Zamora y León)”, términu que repite n’otres plantegaes pol valencianu na que tamién emplega les pallabres “citada región”. “Lo recoyido en dichos documentos supón un reconocimientu por parte del Gobiernu d’España de la vixencia presente de la ‘Región Leonesa’, compuesta por Salamanca, Zamora y Lleón, y que, a pesar de non conformase como comunidá autónoma, sigue esistiendo, representando el “y León” del nome de l’autonomía de Castilla y Lleón”, asegura.