El Gobiernu estatal cuenta con conxelar el salariu mínimu nel 2012

El Ministeriu d’Emplegu y Seguridá Social informó a los sindicatos de la so intención de conxelar el Salariu Mínimu Interprofesional (SMI) nel añu qu’entra por mor de la situación económica. Ésti ye anguaño de 641,40 euros al mes.
 
En subiendo un 1,3 por cientu nel 2011, el SMI quedó establecíu en 21,38 euros al día, 641,40 euros al mes, y, en cómputu añal, en nengún casu perbaxo de los 8.979,60 euros. Pa los trabayadores eventuales y temporerales que desarrollen servicios a una mesma empresa que nun sobrepasen 120 díes, el salariu mínimu queda en 30,39 euros por xornada. A lo último, pa los emplegaos domésticos la cuantía establecida yera de 5,02 euros por hora trabayada.
 
A mediaos d'esti mes, CCOO y UXT enviaron una carta al daquella ministru de Trabayu, Valeriano Gómez, pa que'l salariu mínimu recuperara'l poder alquisitivu perdíu nel 2010 y nel 2011, y caltenelu nel 2012, anque nun demandaben nenguna cifra concreta de xuba. Los sindicatos denunciaben na misiva que'l SMI perdió poder real de compra pol "fuerte aumentu" del IPC y la "moderada xuba nominal" d'esti suelu salarial. Según los cálculos de les dos centrales, el salariu mínimu percíbenlu unos 183.000 trabayadores.
 
El segundu más baxu de la Europa de los 15
 
El SMI español ye ún de los más baxos de los países de la Europa de los 15 que lu tienen establecíu nel so ordenamientu xurídicu con cobertoria xeneral, tanto en términos absolutos como en paridá de poder de compra, namás perriba de Portugal.