El Gobiernu estatal aprueba les bonificaciones del peaxe del Güerna

El Conseyu de Ministros aprobó esti martes el Real Decretu nuevu de bonificaciones de l’autopista AP-66 pa incrementar los descuentos nos peaxes hasta’l final de la concesión nel añu 2050. La rebaxa del 50 por cientu pal Güerna amplíase un 10 por cientu más, tamién pa vehículos pesaos, que queda nun 40 por cientu.

Los llixeros han tener un dispositivu de telepeaxe o Vía-T pa poder acceder al descuentu, que namái s’aplica a partir del tercer viaxe mensual pela autopista completa o del quinto pasu de barrera o recorrido parcial al mes. Mentes, los camiones, autocares y demás vehículos pesaos podrán disfrutar de les rebaxes ensin nengún tipu de condición, dende’l primer trayeutu, tolos díes de la selmana, tanto si paguen n’efeutivu,como con tarxeta o telepeaxe (OBE) en cualquier percorríu.

Pa los primeros la bonifinación amplíase del 50 por cientu al 60, mentes que pa los segundos pasa del 30 al 40. Estos descuentos van entrar a valir el día siguiente a la espublización nel BOE del Real Decretu.

Según los exemplos aportaos pol Ministeriu de Tresportes, Movilidá y Axenda Urbana, “un lleonés que vaya col so turismu toles fines de selmana a Xixón aforrará 49,5 euros en peaxes al mes gracies a les bonificaciones nueves si paga con dispositivu de telepeaxe”. Pela so parte, un camión de cuatro exes (vehículo pesáu de tipu 2) “que descarga dos díes a la selmana n’Uviéu mercancía de Madrid aforrará 204 euros en peaxes al mes col ameyoramientu de les bonificaciones”.