El Gobiernu espera qu'ETA anuncie pasos cercanos hacia'l final

Miembros de Gobiernu treslladaron de manera reservada a dirixentes de dellos partíos políticos que les informaciones que tien sobre ETA apunten a que nes próximes selmanes la organización armada podría anunciar pasos hacia'l final.

Según les fontes consultaes por Europa Press, l'Executivu cuenta con información según la cual, la organización armada taría preparando un nuevu comunicáu anque desconocen el conteníu exactu del mesmu, pero embaraxen dos posibilidaes.
  
Una de les opciones sería qu'ETA tea preparando dos pronunciamientos consecutivos pa les próximes selmanes. Nel primeru d'ellos podría aceptar el pidimientu de la tregua "verificable" que-y facíen los mediadores internacionales na Declaración de Bruxeles, y tamién podríen dar pasos hacia les reclamaciones que-y fizo la mesma izquierda abertzale na Declaración de Gernika, a últimos de setiembre pasáu, na que reclamaben a ETA que, amás d'un altu'l fueu "verificable", tamién fuere "permanente y unillateral".
  
Mientres que nel segundu pronunciamientu, vinculáu a ésti, que se produciría unes selmanes dempués del primeru, la organización armada diría más allá y anunciaría un final de l'actividá armada.
  
La segunda opción qu'embaraxa l'Executivu, en función de la información con que cuenta, ye que'l próximu comunicáu d'ETA puea ser nel qu'anuncie'l preludiu del final.
  
Esto coincidiría cola esperanza de que, según otres fontes, tien Batasuna de qu'ETA emita un comunicáu nes próximes selmanes dando nuevos pasos en respuesta a les esixencies que realizó en delles declaraciones.
 
Nuevu partíu
Los integrantes de la organización illegalizada cuenten con que'l comportamientu de la banda-yos permita presentase a les elecciones de mayu próximu, les municipales y forales y pa ello, confirmaron hasta que tán trabayando pa ser "llegales", cola creación d'un nuevu partíu, con un nome nuevu y col fin de "presentar los estatutos en Madrid".

El representante de la izquierda abertzale, Txelui Moreno, confirmaba güei mesmu estos estremos, anque nun quiso poner fecha pa la presentación del nuevu partíu, tres la información publicada güei nel diariu El Mundo, según la cual la izquierda abertzale va anunciar esti nuevu partíu'l 10 d'avientu.
  
Tamién l'históricu dirixente de HB, Tasio Erkizia, afirmaba ayeri mesmu que la izquierda abertzale taría "con toa seguridá" nes elecciones de mayu porque "hai tiempu bastante" pa llogralo y revelaba que'l PSOE conoz "de primer mano" los pasos que tán dando y calcaba en que "rescampla qu'hai víes de comunicación".
  
Fontes nacionalistes consultaes por Europa Press dan por descontáu que se tán produciendo contactos ente los socialistes y dirixentes de la ilegalizada Batasuna y apunten, amás, que si la izquierda abertzale se decide a presentar un nuevu partíu con unos nuevos estatutos p'acudir a les elecciones ye porque "alguién" díxo-y qu'alantre, que'l camín va espeyándose.      

Cinco pasos nun añu
Dende la denominada 'declaración d'Alsasua', cuando en payares del 2009 la izquierda abertzale fizo pública la so apuesta polos principios 'Mitchell' y l'abertura d'un nuevu procesu n'ausencia de violencia, la banda terrorista emitió hasta agora cinco comunicaos o pronunciamientos sobre esti debate internu y en respuesta a los pidimientos de les sos bases.
  
El primeru foi'l 17 de xineru, cuando s'atribuyía la paternidá de l'apuesta fecha pública pola izquierda abertzale, pero añadía que tovía nun yera'l momentu de cesar la violencia y esclaraba que la competencia pa tomar esa decisión correspondía a la organización. El siguiente foi'l pasáu 4 d'abril nel que la banda tampoco manifestó la respuesta reclamada poles sos bases.
  
Tres estos, siguieron los trés comunicaos de setiembre: el primeru, el cinco de setiembre, nel qu'anunciaba que diba meses que cesara les sos acciones armaes ofensives; nel segundu, el 18 de setiembre, cuando se dirixen a los mediadores internacionales respondiendo a la Declaración de Bruxeles y l'últimu foi una entrevista, el pasáu 25 de setiembre, el mesmu día de la Declaración de Gernika, na que la banda aseguraba tar dispuesta a dar nuevos pasos, pero condicionábalu a una nueva negociación col Gobiernu.