El Gobiernu español va eliminar la paga de 426 euros a paraos

El presidente español, José Luis Rodríguez Zapatero, anunció que'l próximu vienres el Conseyu de Ministros va aprobar la eliminación de l'ayuda de 426 euros a los paraos y nueves rebaxes fiscales pa les pequeñes y medianes empreses.

Asina lo adelantó Zapatero na sesión de control al Gobiernu nel Congresu de los Diputaos y en respuesta a una entruga del líder del PP, Mariano Rajoy, onde aseguró que'l nuevu paquete de midíes pretende favorecer la inversión económica y l'empléu, sobremanera nes pequeñes y medianes empreses.
  
Ello ye qu'una de les midíes que contempla esti nuevu plan ye un cambiu nel primer tramu del Impuestu de Sociedaes que tributa al tipu rebaxáu, establecíu esti añu nel 25%, que va pasar de 120.000 euros a 300.000 euros.
  
De la mesma forma, va ampliase'l conceutu d'empresa de tamañu amenorgáu a partir del volume de facturación, que va pasar d'ocho millones d'euros a diez millones d'euros, lo que va beneficiar, según estimó Zapatero, a unes 40.000 empreses.
  
Coles mesmes, va eliminase la obligatoriedá a toles empreses de pagar cuotes a les Cámares de Comerciu, va xeneralizase la llibertá d'amortización nel Impuestu de Sociedaes hasta l'añu 2015 y van adaptase les midíes contemplaes na Llei d'Economía Sostenible sobre la reducción de plazos y costos al tiempu de crear una empresa.

Más privatizaciones 
Per otru llau, el nuevu paquete de midíes inclúi la privatización d'hasta'l 49% d'Aeropuertos Españoles y Navegación Aérea (Aena) y el 30% de Lloteríes y Apuestes del Estáu. Asina, ábrese la puerta a la entrada de capital priváu y a la xestión privada en réxime concesional de dellos aeropuertos, como'l de Madrid-Barajas y Barcelona-El Prat.
  
Nesti sen, fontes de Moncloa esplicaron que la privatización d'hasta'l 30% de Lloteríes y Apuestes del Estáu tien un valor de mercáu d'unos 30.000 millones d'euros.
  
Ensin ayuda a los paraos
En materia llaboral, el nuevu paquete de midíes va implicar l'aprobación de la regulación de les axencies privaes de colocación esti mesmu vienres y la non renovación de l'ayuda de los 426 euros a los paraos sin ingresos a partir de l'acabación del programa actual, en febreru.
  
Hasta agora, el Gobiernu nun dexara claro si pretendía eliminar o prorrogar esta ayuda, anque sí dexara claro que diba estudiar el funcionamientu de la iniciativa nos últimos meses pa tomar una decisión.
  
El xefe del Executivu avanzó amás que, a partir de febreru del 2011, los servicios públicos d'empléu van contar con otros 1.500 orientadores, coles mires de xenerar actividá y facilitar la creación d'empléu. De la mesma forma, adelantó que los funcionarios de nuevu ingresu van integrar nel Réxime Xeneral y que'l Réxime de Clases Pasives "va quedar a estiguir".