El Gobiernu ellabora un protocolu pa promover el bon tratu a les persones mayores y evitar abusos

|
Pilar Varela y Francisco del Busto

El documentu afita ferramientes pa que los profesionales puedan detectar y intervenir nos casos de maltratu, sobre manera nel ámbitu familiar. Va validase dende payares.

Les conseyeríes de Servicios y Derechos Sociales, y de Sanidá, encargáronse del desarrollu d'esti protocolu, que va testase hasta xunu en residencies públiques, hospitales y centros de salú y al traviés de los servicios sociales municipales. Tres esta fecha va comenzar la so aplicación en tolos centros públicos del país.

La esperiencia pilotu va desendolcase en nueve conceyos (Uviéu, Avilés, Tinéu, Siero, Castrillón, Llanes, Ribadeva, Colunga y Caravia) repartíos n'ocho residencies del ERA (Centru Polivalente de Recursos d’El Cristo, la Residencia Mesta de Xixón, Canapés, Palaciu de Villar, Valentín Palacio, Santa Bárbara, Morea y Balmonte), ocho equipos d’Atención Primaria (Piedrasblancas, Sabugo, El Quirinal, Ventanielles, La Pola Siero y los Severo Ochoa  de Xixón, Llanes-Ribadeva y Colunga-Caravia); y dos hospitales (HUCA y Francisco Grande Covián). L’oxetivu del protocolu ye facilitar una intervención coordinada ente alministraciones y sistemes de proteición, amás de sensibilizar a los profesionales, les organizaciones y la sociedá en xeneral sobre estes situaciones de maltratu.

Amás, y nun escenariu d’avieyamientu creciente de la población, busca conocer meyor esti fenómenu, del que se tien poca información. El so desenvolvimientu enmárcase dientro de les midíes de coordinación sociosanitaria que’l Gobiernu impulsa dende qu’empezó la llexislatura y va favorecer que pela primer vez dambes conseyeríes trabayen xuntes de manera formal nesta materia.

El protocolu trata toles tipoloxíes de maltratu: físicu, psicolóxicu, sexual, financieru, neglixencia y abandonu, y estrema l’ámbitu social-comunitariu, relativu a la sociedá; el rellacional-familiar, venceyáu al entornu cercanu de les persones; y l’institucional, pa mayores que viven nun centru residencial. En caún d’estos ámbitos, el documentu afita factores de riesgu y de proteición y propón procesos y ferramientes pa que los profesionales puedan detectar y intervenir.

Amás, calca nos factores de proteición venceyaos al bon tratu, qu’hasta agora pasaren más desapercibíos cuando se diseñaben procesos d’intervención rellacionaos con situaciones d’abusu. Tamién propón ferramientes específiques pa tratar estos casos cuando se producen nel ámbitu familiar, onde queda más escondío.

Na semaya, Pilar Varela, conseyera de Servicios y Derechos Sociales, y Francisco del Busto, conseyeru de Sanidá, na inauguración d'una xornada de trabayu que se celebra güei n'Uviéu pa dar a conocer el protocolu a los profesionales del ramu.

Contador Estadistiques