El Gobiernu diseña un programa p’aprovechar los escedentes alimentarios aptos pal consumu

El Programa d’Aprovechamientu d’Alimentos destinará los escedentes de la cadena alimentaria aptos pal consumu a los coleutivos más desfavorecíos. Bienestar Social decicaráse a la coordinación y el Banco de Alimentos, a la loxística.

 

Esther Díaz, conseyera de Bienestar Social y Vivienda, presentó güei la propuesta a la Mesa Ciudadana contra la Probeza y la Esclusión Social. Ésta busca aprovechar los escedentes que se producen nes fases diferentes de la cadena alimentaria y son aptos pal consumu, cola fin de destinalos a les persones y coleutivos más desfavorecíos. D’esta forma tamién se promueve un usu social, responsable y sostenible de los alimentos.

 

Na ellaboración y desendolcu d’esti programa participen, amás de Bienestar Social, les conseyeríes d’Educación, Sanidad y Agroganadería, amás de los servicios sociales municipales, delles entidaes ensin ánimo d’arriquecimientu y sectores empresariales del sector agroalimentariu y pesqueru venceyaos a la producción, distribución y comercialización de alimentos. Hai que destacar que’l 42 por cientu del desperdiciu de comida produzse nes cases, según un estudiu de la Confederación Española de Cooperativas de Consumidores y Usuarios-Hispacoop del 2012, polo que’l Programa d’Aprovechamientu d’Alimentos tamién va incluyir campañes de sensibilización pa favorecer el consumu razonable y non impulsivu.

 

Otra manera, Díaz tamién anunció que’l Gobiernu va incrementar la so aportación a la llinia d’ayudes direutes destinaes a families con menores al so cargu y que tean pasando por dificultaes económiques graves. Asturies va movilizar 1,4 millones d’euros, de los que 600.000 correspuenden a l’aportación propia y 800.000 al Estáu. D’igual forma, aseguró que va solicitar a la ministra de Sanidá, Ana Mato, nel Conseyu Territorial de Servicios Sociales y del Sistema pa l’Autonomía y Atención a la Dependencia del miércoles, que’l Gobiernu estatal caltenga nel tiempu estes ayudes y que s’incluyan nos Presupuestos Xenerales, yá qu’énte la situación actual “ye necesario un pautu d’Estáu pa trabayar pol bienestar de la infancia y les families”.