El Gobiernu destina 1,1 millones a la financiación d'actividaes por parte de los conseyos reguladores

Esti 2016 los conseyos reguladores esistentes nel país disponen de 1.133.679 euros pa la financiación d'actividaes qu'impulsen la ellaboración y promoción de productos agroalimentarios de calidá. 'Ternera Asturiana', con 380.469 euros, recibe la cantidá más alta.

Anguaño son siete los conseyos reguladores constituyíos n'Asturies, de los que dos tutelen les Indicaciones Xeográfiques Protexíes (IXP) de 'Ternera Asturiana' y de Faba Asturiana, mentes que'l l restu correspuenden a les Denominaciones d'Orixe Protexíes (DOP) de 'Sidra de Asturias', Gamonéu, Cabrales y Afuega'l pitu. Tamién ta incluyíu nesti conxuntu el Consejo de la Producción Agraria Ecológica del Principado de Asturias (COPAE) y les trés asociaciones qu'actúen como entidaes de xestión, esto ye, la DOP 'Vino de Calidad de Cangas', la DOP 'Queso Casín' y la IXP 'Chosco de Tineo'.

La subvención de mayor cuantía, aprobada ayeri pol Conseyu de Gobiernu, ta dirixida a 'Ternera Asturiana', que recibirá 380.469 euros, de los que 250.000 van pal control de calidá y 130.469 pa promoción. El restu repártense asina: 'Faba Asturiana', 82.773,64 euros; 'Sidra de Asturias', 176.225,75 euros; Cabrales, 109.811,94 euros; COPAE, 191.250,40 euros; 'Vino de Calidad de Cangas', 47.202,84 euros; Afuega'l Pitu, 42.270,37 euros; Gamonéu, 58.974,09 euros; 'Chosco de Tineo', 18.937,01 euros; y 'Queso Casín', 25.763,57 euros.

Hai que destacar que del total de 1.133.679 euros repartíos, 756.290 destínense a la realización de controles de calidá y 377.389 a la promoción de la marca.