El Gobiernu declara la esistencia nel país de la plaga del picudu coloráu de les palmeres

Esti coleópteru orixinariu d'Asia causa importantes daños nestos árboles.

El Boletín Oficial del Principáu d'Asturies (BOPA) espublizó ayeri'l resolvimientu pol que se declara, en tol territoriu nacional, la presencia de la plaga del organismu nocivu Rhynchophorus ferrugineus (Olivier), conocíu como picudu coloráu de les palmeres. D'igual forma, afita, de forma coordinada ente les conseyeríes de Desarrollu Rural y Recursos Naturales y la d'Infraestructures, Ordenación del Territoriu y Mediu Ambiente, diverses midíes fitosanitaries pal so desaniciu y control.

L'escarabayu que tien como hábitat el sur asiáticu causa importantes daños nes palmeres, yá que los sos bárabos aliméntense ensin xacíu nel interior del tueru y la corona d'estos árboles hasta llegar a destruyilos na so práutica totalidá. El primer focu que se deteutó nel Estáu foi n'Andalucía, nel añu 1995, y dende entós estendióse per tola Península Ibérica a pesar de les distintes actuaciones que, pal so control, fixeron les alministraciones públiques.

N'Asturies, el picudu coloráu de les palmeres deteutóse l'añu pasáu en dos finques d'Uviéu, a lo que siguieron cuatro focos nel conceyu de Siero, que se notificaron al Ministeriu d'Agricultura y Pesca'l 23 de payares.

Resolución de calter transitoriu

La resolución, que va tar vixente mientres se caltenga la condición d'especie plaga de declaración obligatoria pola Xunión Europea, daqué qu'anguaño se ta revisando, establez un programa d'inspeición y aplicación de midíes de desaniciu. Tanto la execución d'estes midíes como los gastos que s'anicien van correr al cargu de los interesaos, yá que que nun afeuta a producciones primaries sinón a vexetación de calter decorativu y de xardinería.

Ente otros asuntos, afita que les persones físiques o xurídiques propietaries de plantes sensibles tendrán de comunicar a Desarrollu Rural y Recursos Naturales la llocalización de los exemplares, amás d'aplicar les midíes preventives qu'inclúin na normativa. Tamién van tener que proceder a la eliminación de les afeutaes pol patóxenu y comunicar l'apaición de síntomes d'ataque del organismu nocivu, mesmo que permitir al personal téunicu de l'alministración l'accesu a los llugares onde tean allugaos exemplares d'estes especies, cola fin de realizar prospeiciones y permitir la evaluación de los síntomes sospechosos.

Na imaxe, bárabu del picudu coloráu de les palmeres. Semeya obra de Luigi Barraco baxo llicencia CC BY-SA 3.0.