El Gobiernu de Rajoy prevé aforrar otros 10.000 millones con reformes en sanidá y educación

Mariano Rajoy caltuvo esti llunes delles reuniones colos sos ministros. El motivu d’estos aconceyamientos yera preparar el Programa de Estabilidad  2012-2015 y reformes en sanidá y educación p’aforrar 10.000 millones d’euros.
 
De primeres, Rajoy viose cola vicepresidenta del Gobiernu, Soraya Sáenz de Santamaría; el ministru de Facienda, Cristóbal Montoro; el d'Economía y Competitividá, Luis de Guindos; y el direutor de la Oficina Económica, Álvaro Nadal, pa definir los conteníos del Programa de Estabilidad 2012-2015 y el Programa Nacional de Reformas de España pal 2012, que van presentase a la Comisión Europea nesti mes d'abril. Nel primeru estableceráse "el compromisu firme" de reducir el déficit públicu al 3 por cientu del PIB nel 2013 y s’introduz un cuadru macroeconómicu que reflexa que "la estabilidá presupuestaria mayor y les reformes estructurales dirixíes al crecimientu supondrán un cambiu na tendencia recesiva y de destrucción d’emplegu qu’esperimenta la economía española anguaño", según señalaron dende’l Gobiernu.
 
Coles mesmes, el xefe del Executivu estatal viose cola ministra de Sanidá, Ana Mato, y el titular d'Educación, José Ignacio Wert, cola fin de "definir el Programa Nacional de Reformas" y "determinar les reformes dirixíes a llograr una mayor racionalización, eliminación de duplicidaes y eficiencia na xestión de los grandes servicios públicos, que van entamase nesti mes". L'aforru previstu pol Gobiernu va superar los 10.000 millones d'euros.