“El Gobiernu d'Asturies va facer una conmemoración histórica del 25 de mayu”, anuncia Barbón

El 25 de mayu, fecha escaecida poles instituciones asturianes y reivindicada por dellos sectores de la sociedá dende hai décades pa celebrar el Día d’Asturies, va tener por fin reconocencia. El presidente Adrián Barbón anunció “una conmemoración histórica” de la declaración de soberanía de la Xunta Xeneral del 1808.

El socialista comunicó esta decisión un día depués del 8 de setiembre, Día de la Santina, que va siguir siendo la xornada nel que’l Gobiernu va facer l’actu institucional pol Día d’Asturies al ser “cuando correspuende”. Nel Edificiu Históricu de la Universidá d’Uviéu, na xornada de l’apertura oficial del cursu, añadió que “esiste una reivindicación social pa una conmemoración histórica del 25 de mayu. El Gobiernu d’Asturies va facela”.

D’esta forma ún de los fechos más destacaos de la nuesa historia va tener la reconocencia que merez por parte de les instituciones. El 25 de mayu del 1808 ye’l momentu nel que’l pueblu asturianu asume la so soberanía al traviés de la Xunta Xeneral, declara la guerra a los franceses y organiza un exércitu, con unvíu d’embaxadores a Inglaterra; tamién lleva a la creación de la bandera d’Asturies a partir d’un informe de Gaspar Melchor de Xovellanos a pidimientu del marqués de Camposagrado nel 1794, recuperada depués por Conceyu Bable na década de los 70 del sieglu pasáu y declarada oficial pol Gobiernu nel 1990.

Na semeya, Barbón xunto con Santiago García Granda, rector de la Universidá d'Uviéu.