El Gobiernu d'Asturies financia con 165.000 euros un proyectu d’Unicef en Mali

Esta actuación ye la segunda a la que más fondos aporta'l Principáu en materia d'ayuda al desenvolvimientu y resulta esencial pa prevenir la mortalidá ente los menores del país africanu.

El Gobiernu del Principáu va financiar con 165.000 euros un conveniu de collaboración en materia d'ayuda al desenvolvimientu col Comité d’Unicef n'Asturies pa sofitar el programa de prevención y tratamientu de la desnutrición crónica y el retrasu na crecedera de menores de cinco años que la oenexé desenvuelve en Mali. 

Esta iniciativa (el conveniu va formalizase pa la so segunda fase), encara la crisis humanitaria dende dos ámbitos. Per un llau, promueve bones práctiques d'alimentación pa los naciatos ente les madres y les families, cola mira de prevenir la desnutrición, de forma que les muyeres tean cada vez más informaes sobre les formes de variar la so dieta, los beneficios de la lactancia materna y los vezos qu'afecten negativamente a la salú y bienestar de la infancia. Otra manera, empréstase atención a los menores afectaos por desnutrición mediante cuatro acciones:

• La distribución de melecines esenciales y suministros d'alimentación suplementaria adaptaos al estáu nutricional y la edá de los menores, como alimentu terapéuticu llistu pal so consumu.
• L’apoyu a los equipos sanitarios pal siguimientu y control de la xestión integrada de la desnutrición aguda.
• La divulgación y promoción de les meyores práctiques de lactancia materna pa neños de 0 a 6 meses por aciu asesoramientu individual, ayuda de grupu y apoyu al Día Mundial de la Lactancia Materna.
• La capacitación d'axentes y trabayadores de salú, madres y líderes de les comunidaes tradicionales.

Unu de los países con más mortalidá infantil

Esta actuación ye la segunda a la que más fondos aporta'l Principáu en materia d'ayuda al desenvolvimientu, tres los programes pa la meyora de les condiciones de les families sah.aragüis refuxaes n'Arxelia. El proyectu resulta especialmente importante, una y bones Mali ye unu de los países del mundu con más mortalidá infantil y la desnutrición añede un mayor riesgu de fallecimientu por infecciones comunes. Según datos d’Unicef, el 30 % de los menores de cinco años carez desnutrición crónica y un 13 %, aguda, una situación a la que se suma'l conflictu bélicu nel norte d'esta nación, qu'afecta a cuasi trés millones de persones.

El conveniu con Unicef enmárcase ente les prioridaes de la llei autonómica de Cooperación al Desenvolvimientu del 2006, que cunta ente los sos principios rectores cola acción humanitaria como estratexa p'atender necesidaes urxentes y situaciones de vulnerabilidá por desastres y crisis.

Esta prioridá tuvo'l so reflexu nel desenvolvimientu del IV Plan Director de Cooperación, nel qu'esta mena d'acciones concentró'l 24 % de l'ayuda esterior del Principáu, con 4,1 millones. Nesta llinia enmárquense les actuaciones empobinaes a les families sah.aragüis en campos de refuxaos n'Arxelia, les subvenciones d'emerxencia énte catástrofes o crisis, como la situación de los refuxaos sirios; la protección de los derechos humanos y el sofitu a la población palestina asitiada nel Llíbano y Xordania. Esta orientación caltiénse nel V Plan Director, que la so vixencia estiéndese hasta’l 2021.