El Gobiernu da a conocer a los cinco aspirantes al Premiu al Meyor Cantar

El cantautor Alfredo González y los grupos Asturiana Mining Company, Bacotexo, Macadamia y Xera van aspirar a llevase’l Premiu al Meyor Cantar d’esti añu. La gala va celebrase’l 25 de febreru en Xixón nel Teatru de la Llaboral.
 
Esta mañana dábense a conocer a los cinco candidatos nun actu nel que tuvieron presentes dellos músicos de los grupos finalistes y el direutor xeneral de Política Llingüística, Alfredo Ignacio Álvarez Menéndez. Nesta ocasión, los escoyíos son dos grupos de música tradicional, ún de rock, ún de folk-electrónicu y un cantautor. Asina, na gala de la Llaboral, na que va dase a conocer al ganador, van poder sentise los cantares ‘Si nun conoces Vaḷḷouta’, de l’Asturiana Mining Company; ‘L’altanera’, de Macadamia; ‘Campos de meiz’, de Bacotexo; ‘Yo quixera’, de Xera; y ‘Felina Bipolar’, d’Alfredo González.
 
Hai que destacar, que dos de los candidatos yá saben lo que ye llevase’l Premiu al Meyor Cantar: Alfredo González nel 2009 con ‘La nada y tu’, y Xera nel 2010 con ‘Tierra’. Esti trunfu permitió-yos participar nel Liet International, el certame de la canción en llingües minorizaes qu’esti añu, si nun hai novedá, va celebrase en Xixón.
 
Na gala del Premiu, prevista pa les 19 hores del sábadu 25 de febreru –la entrada pal públicu, llibre hasta completar aforo, va permitise hasta les 18.50 hores yá qu’ésta va ser televisada en direuto pela TPA–, tolos grupos van interpretar el so cantar candidatu. Amás, tamién va participar Skama la Rede como ganador del añu pasáu con ‘Condenáu’.