El Gobiernu da “lluz verde” al rescate y a los creitos bancarios

El Conseyu de Gobiernu aprobó esti martes dar “lluz verde” a la solicitú al Fondu de Liquidez Autonómicu (FLA) por 261,7 millones d’euros y a los creitos bancarios por 162 millones. Algamará asina los 423 millones que necesita.

En rueda prensa, el conseyeru de Presidencia y voceru del Executivu, Guillermo Martínez, destacó que'l Gobiernu buscó "les meyores condiciones", que pasen per acoyese al FLA al máximu permitíu, y completalu con creitos bancarios nes entidaes Liberbank, Banco Herrero, Caja Rural, La Caixa y BBVA, a los qu'Asturies pue acceder "por ser unes de les comunidaes con menos deuda". Los 423 millones d'euros que consigue agora l'Executivu son los que diz necesitar pa executar el presupuestu prorrogáu del 2012.

"Nel momentu que se tien garantizada la financiación, el presupuestu automáticamente empieza a funcionar con esa ampliación económica", indicó Martínez, pa quien l'oxetivu final del Gobiernu ye "solucionar" los problemes de la sociedá asturiana. El conseyeru defendió la posición crítica inicial del Gobiernu sobre'l fondu, en rellación cola necesidá de mayor axilidá tanto na definición del FLA como nes sos condiciones d'accesu y, sobre manera, sobre'l "respartu desigual" del mesmu. Y ye que pal Gobiernu asturianu esti fondu "da más posibilidaes" a aquelles comunidaes con mayor grau d'endeudamientu y "castiga" a les autonomíes coles cuentes "más saniaes". Con too, dende l’Executivu confíen en que'l Gobiernu de Mariano Rajoy exerza la so responsabilidá pa que nun "se vincule l'accesu al Fondu de Liquidez Autonómica con nengún dramatismu".

Otra manera, Martínez anunció que la conseyera de Facienda y Sector Públicu, Dolores Carcedo, formalizó una solicitú pa comparecer a pidimientu propiu na Xunta Xeneral pa detallar les carauterístiques de la financiación.