El Gobiernu d’ Asturies aumenta esti cursu les ayudes a la compra de llibros de testu hasta los 2,8 millones

La Conseyería d'Educación va conceder esti cursu académicu 2019-2020 un total de 2.793.945 euros n'ayudes individuales para subvencionar la compra de llibros de testu nel Principáu d'Asturies.

D'ellos, 2,3 millones destínense a subvenciones pal usu, en réxime de préstamu, de llibros de testu en centros educativos públicos, ente que los 485.625 euros restantes van permitir la compra de testos pal alumnáu que curse estudios d'enseñanza obligatoria en centros privaos concertaos.

Esta partida increméntase ca añu nel presupuestu del Gobiernu del Principáu y al 20% d'aumentu que yá se rexistró'l cursu pasáu súmase agora una xubida averada al 15%, hasta asitiase en 2,8 millones.

Referente a los centros educativos públicos, de les 30.842 solicitúes presentaes propunxéronse para concesión les 21.729 que cumplíen los requisitos de la convocatoria, que yá foi publicada y notificada mesmo a los centros educativos como a les families. La conseyería trabaya agora en resolver los recursos presentaos.

Pela so parte, la convocatoria del programa d'ayudes de llibros de testu p’alumnáu que curse estudios d'enseñanza obligatoria en centros privaos concertaos va publicase nel Boletín del Principáu d'Asturies (Bopa), previsiblemente, el 10 de setiembre y les solicitúes van poder presentase ente los díes 16 y 27, dambos inclusive.

Esti doble sistema de xestión, implantáu nel cursu 2015-2016, permite a los centros públicos crear bancos de llibros y caltieén les ayudes individuales nos concertaos. La diferencia respuende a llimitaciones llegales, cuidao que’l réxime xurídicu de la enseñanza privada nun dexa al Principáu realizar un tresvase de fondos más allá de los previstos nel conciertu educativu, a diferencia de lo qu'asocede na escuela pública.

Nel cursu 2018-2019, el 72% del alumnáu de Primaria de centros públicos participó nel programa de préstamu y reutilización de llibros. En Secundaria, el porcentaxe de beneficiarios asitíase nel 55%.