El Gobiernu concede la Medaya d'Oru d'Asturies al periodista Vaquero

José Manuel Vaquero va recibir la medaya d'oru d'Asturies pol so "compromisu" col país por trés décades al frente del diariu 'La Nueva España'. La entrega va celebrase'l Día de la Nación Asturiana xunto a la de los otros seis gallardonaos coles de plata.

Natural de Güeñu, Vaquero graduóse pola Escuela Oficial de Periodismo de Madrid y ye llicenciáu y doctor en Ciencies de la Información pola Universidad Complutense de Madrid. La so trayeutoria profesional desendolcóla casi na so totalidá nel periódicu uviedín, onde ocupó los cargos de redautor, xefe de seición, direutor, subdireutor xeneral y direutor xeneral, siendo hasta avientu del 2014 conseyeru delegáu d'Editorial Prensa Ibérica, grupu al que pertenez anguaño la cabecera. Tamién tien trabayao pa la desapaecida 'Hoja del Lunes de Oviedo', 'Asturias Semanal', 'El País', Radio Nacional de España y 'La Voz de Asturias'.

Otra manera, el Conseyu de Gobiernu decidió tamién esta mañana entregar medayes de plata a les cooperatives El Orrio y Campoastur, a Alejandro Mieres, a Laureano Víctor García, a l'Asociación de Ayuda a Personas con Parálisis Cerebral (Aspace) y a la Fundación Banco Sabadell. Les medayes d'Asturies resérvanse, según la Llei Reguladora d'Honores y Distinciones, pa "premiar méritos verdaderamente singulares que concurren en persones o instituciones con importancia y trescendencia pa los intereses xenerales de la comunidá autónoma".

Na semeya, Vaquero, Fernández y Enrique García Candelas enantes d'un almuerzu informativu de 'La Nueva España' n'avientu del 2014. Imaxe obra d'Armando Álvarez.