El Gobiernu comienza a redautar los planes d'adaptación de los cais al cambiu climáticu

Robló un conveniu cola Fundación Instituto de Hidráulica Ambiental de Cantabria pa la so ellaboración nun plazu de 14 meses.

El conseyeru d’Infraestructures, Ordenación del Territoriu y Mediu Ambiente, Benigno Fernández Fano, y el vicepresidente de la entidá cántabra, Raúl Medina, punxeron la so firma al alcuerdu pa la redaición de los planes d’adaptación al cambiu climáticu de los terrenos de dominiu públicu marítimo-terrestre adscritos al Gobiernu d'Asturies. Esti documentu va dexar trabayar al Executivu de forma más eficaz, tanto p’ameyorar la funcionalidá de les instalaciones portuaries como pa reforciar la función de los puertos como primer llinia de defensa d’árees poblaes.

En virtú del alcuerdu, l’Alministración va apurrir información sobre les operaciones, l’actividá económica y los daños históricos asociaos a cada cai. Pela so parte, la fundación cántabra va analizar los riesgos del cambiu climáticu nestes infraestructures, va proponer midíes d’actuación y va encargase de redautar el plan nacional d’adaptación.

En concreto, va facer un análisis multinivel de los riesgos del cambiu climáticu nos puertos adscritos a Asturies énte escenarios estremaos, van proponese midíes naquellos que sía necesario y va ellaborase dichu plan d'adaptación, que va incluyir una evaluación de la rellación ente’l costu y la eficacia de les midíes. Esti proyeutu tien un presupuestu de 511.000 euros y un plazu d’execución de 14 meses, lo que va dexar cumplir col marcu temporal establecíu pol Ministeriu pa la Transición Ecolóxica nel contestu del plan Pima Adapta Costa, qu’asignó a Asturies 151.395 euros pa collaborar na so redaición.

Estudios dende'l 2009

Los trabayos yá comenzaos dan continuidá a una partida d’estudios pioneros sobre les evidencies y los efeutos potenciales del cambiu climáticu nel país qu’empezaron nel 2009. Depués, nel 2013, firmóse un conveniu col Ministeriu d’Agricultura, Alimentación y Mediu Ambiente que valió pa desenvolver un proyeutu pilotu pa evaluar la vulnerabilidá de la costa asturiana basáu nuna metodoloxía específica novedosa implementada pol Instituto de Hidráulica de Cantabria.

Esi estudiu pilotu, llamáu abreviadamente 'C3E-Asturias', concibióse como continuación y aplicación d’otru más ampliu: 'Cambio climático en la costa española (C3E)', que valió de base pa la redaición de la Estrategia Española de Adaptación al Cambio Climático aprobada nel 2017.

Na semeya, nel centru, Fernández Fano y Medina nel momentu de la robla acompañaos d'Elena Marañón, direutora xeneral de Prevención y Control Ambiental, y José María Pertierra, direutor xeneral d'Infraestructures y Tresportes.