El Gobiernu cifra en 30 millones d'euros el retornu pa la marca 'Asturies' que xeneró l'apertura de la variante

Emplega datos de la empresa Onclusive.

Más de 2.000 noticies fixéronse ecu de la llegada de la velocidá alta ferroviaria a Asturies, tanto en soportes escritos como en televisión, radio y, mui especialmente, en medios dixitales, ente'l 19 d'ochobre, cuando s'anunció la fecha definitiva d'apertura de la variante de Payares el 30 de payares, hasta'l 10 d'avientu. Éstes xeneraron un impautu de 4.260 millones d'impresiones en medios de comunicación estatales que supondríen un valor publicitariu de 30,2 millones.

Dende l'Executivu apunten qu'esti impautu orgánicu (ensin inversión) reforzóse y focalizóse hacia la so vertiente turística col llanzamientu d'una campaña publicitaria col lema 'Asturias, más cerca que nunca' en puntos estratéxicos de les principales ciudaes peles que pasa la llinia ferroviaria Xixón-Madrird. Atocha y Nuevos Ministerios, amás de los intercambiadores de l'avenida d'América, Plaza Castilla, Moncloa, Príncipe Pío y Plaza Elíptica, foron los llugares escoyíos en Madrid p'anunciar la llegada de la velocidá alta al país, mentes que na plaza de Callao, la Gran Vía y dellos centros comerciales promociónase a  Asturies como destín cercanu aprovechando la gran afluencia de públicu nestes feches navidiegues.

Lleón y Valladolid tamién acueyen esta campaña con 'mupis' nes estaciones de tren y autocar, y nel centru. En total, la campaña, que llegó a programes de máxima audiencia en televisión, noticias nes principales cabeceres editoriales estatales y redes sociales, xeneró dalgo más de 174 millones de contautos nuna audiencia acumulada de 31.659.288 persones, según Kantar Media y GFK.

Na semeya, pantalla con publicidá (skyled) de la campaña 'Asturias, más cerca que nunca' a la entrada del intercambiador de la madrilana Plaza Elíptica.