El Gobiernu celebró en Madrid la xornada 'Asturies Investor's Day'

50 empreses emerxentes y 14 compañíes consolidaes participaron nel 'Asturies Investor's Day', alcuentru xunto con 76 inversores d'altu nivel. Francisco Blanco destacó na inauguración del eventu les fortaleces d'Asturies como destín d'inversiones qu’axunta tradición industrial, innovación y un entornu sostenible.

El conseyeru d'Emplegu, Industria y Turismu acudió a la xornada organizada na capital castellana pol Institutu de Desenvolvimientu Económicu del Principáu d'Asturies (Idepa) cola collaboración de la Federación Asturiana d'Empresarios (Fade), qu'axunta a más de 250 asistentes ente empreses, inversores y representantes d'oficines comerciales estranxeres. Blanco esplicó qu'Asturies ye una comunidá asociada a sectores tradicionales como'l carbón, l'aceru, la lleche y la pesca, “que pasaron per un procesu de reconversión y foron quien a anovar, afaciéndose a mercaos nuevos, y que tamién se diversificaron, dando llugar a empreses nueves de base teunolóxica y sectores como la bioteunoloxía y les teunoloxíes de la información y les comunicaciones (TIC)”.

Ente les ventayes del Principáu como llugar pa invertir, el conseyeru destacó aquelles venceyaes a la tradición industrial. “Cuntamos con una mano d'obra cualificada asociada a una cultura industrial onde la teunoloxía, la innovación y la disposición al cambiu son elementos habituales”, valoró. Refirióse tamién a la esistencia de servicios avanzaos pa empreses, ente ellos, los qu'ufierten inxenieríes como Duro Felguera, TSK, IMASA y IDESA.

La disponibilidá d'enerxía y agua, les infraestructures loxístiques y portuaries, amás de la bayura de suelu industrial, figuren tamién ente los atractivos d'Asturies pa los inversores, según señaló'l titular de Turismu. Coles mesmes, Blanco valoró les “infraestructures que dan soporte a la investigación, el desenvolvimientu y la innovación (I+D+i), como la Universidá d'Uviéu y los centros teunolóxicos, ún d'ellos presente nesta xornada, l'Institutu Teunolóxicu de Materiales, vital pal futuru de la industria del aceru y metalmecánica”.

Tamién sorrayó que les empreses tienen “numberosos preseos de promoción económica, implementaos al traviés del Idepa y alliniaos cola estratexa d'especialización intelixente de la XE, capaces de canalizar los fondos Feder”. L'enfotu empresarial qu'esiste na comunidá, avalada pola presencia de más de cien empreses de capital estranxeru, ye a xuiciu del conseyeru, otra de les principales baces d'Asturies.

Ente dellos exemplos, Blanco citó los de Bayer, que fabrica n'Asturies el 100 por cien del principiu activu de la aspirina; ENCE, que tien nel país la planta de xeneración con biomasa más grande d'España, y ThyssenKrupp, que desenvolvió'l primer prototipu d'ascensor ensin cables del mercáu nel so centru mundial d'I+D en Xixón.

Na semeya, el presidente de la CEOE, Juan Rosell; el presidente de Fade, Pedro Luis Fernández; y Blanco.