El Gobiernu celebra’l Día Internacional de la Llingua Materna con teatru

|
'Hansel y Gretel' Higiénico Papel

La Direición Xeneral de Planificación Llingüística entama con motivu de la celebración del Día Internacional de la Llingua Materna, que tien llugar esti xueves (21 de febreru), dos representaciones teatrales pa escolinos y p’adultos. Van tener llugar en Cangas del Narcea y Candás el miércoles y el xueves, de manera respeutiva.

Les actividaes empiecen mañana nel Teatru Toreno, a les 11.30 horas. Ellí va desenvolvese un actu pal alumnáu de Primaria de los centros públicos del conceyu, gracies a la collaboración del Ayuntamientu de Cangas del Narcea, onde se va ufiertar la representación de ‘Hansel y Gretel’ na versión de la compañía Higiénico Papel Teatro, que resultó obra ganadora del II Premiu y Festival Nel Amaro de Teatru Profesional n’Asturianu y Gallego-asturiano.

El mesmu xueves, xornada na que se celebra’l Día Internacional por convocatoria de Naciones Xuníes, va tener llugar un actu nel Teatru Prendes de Candás en collaboración col Conceyu de Carreño. Trátase de la representación de la obra d’Adolfo Camilo Díaz ‘Muyeres Inesperaes’, a cargu de la compañía Ververemos, dende les 20 hores.

Manifiestu

Nun son les úniques actividaes pa estos díes, yá que dende delles instituciones y colexos entámense eventos al rodiu del Día Internacional de la Llingua Materna. Nos centros va lleese nel recréu’l yá tradicional manifiestu n’asturianu y en gallego-asturiano que destaca les ventayes d’una educación plurillingüe.

Na semeya, una escena de 'Hansel y Gretel'.

Contador Estadistiques