El Gobiernu calcula recibir 280 millones d'euros del Fondu de Compensación

Adrián Barbón anunció na Xunta Xeneral que’l so Gobiernu calcula recibir 280 millones d’euros de los 16.000 del Fondu de Compensación pola COVID-19. El presidente llamó a Ciudadanos a defender los intereses d'Asturies sofitando nel Congresu el repartu “pa que nun se queden en 200, como pue pasar”.

Na sesión d'esta mañana respondió a Laura Pérez Macho, vocera del partíu naranxa, “que soi mui difícil de contentar” a la entruga de si taba satisfechu colos criterios del repartu del fondu, pa depués señalar que “los datos qu’ayeri conocimos ameyoren sustancialmente la previsión inicial”. Foi’l momentu nel qu’aprovechó pa pidir a la diputada pa que “faiga lo posible pa que nun haya cambios nel Congresu que perxudiquen los interes d’Asturies”.

Pérez Macho criticó darréú que “vusté vienda l’ésitu enantes de que llegue’l resultáu”, acusó al presidente de nun aprovechar les videoconferencies de los domingos con Pedro Sánchez p’algamar meyores nel repartu y demandó conocer les cuentes. Barbón defendió “que fuimos unes de les comunidaes autónomes que más batalla dio” na negociación, algamando que s’introduxera la valoración de la población protexida equivalente, un conceptu global, el de la población, que diba pesar un 27 por cientu “y que consiguimos ellevar a más d’un 38 por cientu d’esos 9.000 millones”.

Tamién citó la batalla por tener en cuenta los PCR por cada mil habitantes –“nosotros somos la segunda comunidá que más fixo”– en llugar del total de pruebes, y que “nun se compensara namái la perda d’ingresu, porque hai comunidaes que van a camuflar como perda d’ingresos la baxada d’impuestos”, consiguiendo que “un 40 por cientu de la perda d’ingresos d’esos 4.200 millones –800 van a tresportes– va ser por población axustada. Eso algamámoslo nós, el Gobiernu d’Asturies”.

Finalmente, énte la insistencia de Pérez Macho, dio una cifra estimativa de 280 millones d’euros a recibir por Asturies d’esos 16.000, pa demandar depués a la vocera que “faiga vusté presión pa qu’esos 280 millones nun se queden en 200, como pue pasar nel Congresu”, dando asina una importancia especial a los 10 diputaos de Ciudadanos na Cámara Baxa.

Na imaxe, Barbón escucha a Pérez Macho mientres se dirixe a él. Semeya obra d'Armando Álvarez.