El Gobiernu busca 70 families p'acoyer a menores

El programa 'Families canguru' busca contar una bolsa de 70 llares qu'acueyan a los menores que lleguen al sistema de proteición infantil del Gobiernu. L'oxetivu d'esta iniciativa na que participa la Cruz Bermeya ye qu'estos neños y neñes puedan crecer nun ambiente familiar.

Pa llogralo ye necesario contar con families dispuestes a realizar acoyimientos de too tipu, pero sobre manera temporales inmediatos, que permitan que los menores, especialmente los que nun lleguen a los 7 años, puedan vivir en familia dende'l momentu nel que requieren el sofitu de l'Alministración. Estos agospios son necesarios mientres se resuelven les circunstancies que-yos torguen convivir cola so familia biolóxica, por casu, o mientres el Principáu estudia cada casu particular.

'Families canguro' desendólcalo la Conseyería de Servicios y Derechos Sociales xunto con Cruz Bermeya dende'l 2002, tiempu nel que la organización non gubernamental trabayó con 72 families pa emprestar apoyu a 158 menores. Anguaño cuenta con 23 families. 

Cruz Bermeya tamién desarrolla l'actuación 'Families voluntaries', dirixida a facilitar estancies temporales –fines de selmana y vacaciones– en llares pa pequeños que yá viven en centros públicos. Nesti programa participaron 221 families qu'acoyeron a otros tantos menores dende 2002. Anguaño esta iniciativa dispón de 28 families.