El Gobiernu asturianu va pidir más llicencies de TDT a Madrid

La Xunta Xeneral del Principáu aprobó ayeri por unanimidá, colos votos de los trés grupos parlamentarios, la proposición non de llei que presentare IX-BA y que-y pide al Gobiernu asturianu que proceda nel plazu de 6 meses a la revisión del Plan Técnicu Nacional de la Televisión Dixital Terrestre (TDT) p'ampliar el númberu de llicencies a conceder n'Asturies. El PP, con votar al favor, calificó de "farsa" la pitición en cuantes que lo que se-y pide al Gobiernu Central "ye dalgo a lo que yá se comprometiera Madrid".

Ello ye que'l Gobiernu asturianu, anque va pidir más llicencies a Madrid, nun va sacar a concursu les dos llicencies d'ambitu autonómicu que tien acutaes, una pa la ufierta nun futuru de servicios telemáticos y la otra en previsión d'una futurible segunda canal de la TPA.

Los populares enfrentáronse a IX na sesión por almitir les enmiendes del PSOE al testu de la proposición y afitáronse na so idea de que'l repartu de llicencies de la TDT foi un castigu a "los medios que nun-y gusten al PSOE" en referencia TeleAsturias y Popular TV, que nun llograron llicencies d'emisión nel concursu de repartu.