El Gobiernu asturianu quier pesllar la reforma del Estatutu nesta llexislatura

El Gobiernu asturianu aconceyó esta mañana nuna sesión del Conseyu de Gobiernu na que se dio de pasu la propuesta de solicitú de dictamen al Conseyu Consultivu d'Asturies, órganu creau apocayá y que ye l'ente supremu de consulta de que dispón el Gobiernu asturianu, sobre la reforma del Estatutu d'Autonomía d'Asturies.

El documentu que se presentó a última hora d'esta mañana ye'l que l'executivu asturianu ellaboró partiendo de los estudios de los "comités d'espertos" y inxerta un catálogu d'entrugues colos aspectos o ámbitos susceptibles de contemplase nel procesu de reforma estatutaria, que yá ta entamáu. Dende'l Gobiernu valoróse que ye "mui deseable" que la reforma del Estatutu d'Autonomía d'Asturies s'apruebe enantes de que fine l'actual llexislatura y calificó de "reflexó aposentada, participativa y rigorosa" a la que se lleva dende va meses nel sen del Gobiernu pa estudiar les modificaciones y cambeos que se ve preciso facer nel testu del estatutu.