El Gobiernu asturianu presenta un plan pa universalizar l’accesu a internet

El viceconseyeru de presupuestos y Alministración Pública, Luis Iturrioz, presentó esta mañana los pormenores del proyectu pol que'l Gobiernu que se compromete a llevar internet de banda ancho a tolos llugares d'Asturies.

El proyectu, que se complementa cola rede de banda ancho que tien alxudicada Alcatel y que va facese nos conceyos de les cuenques mineres, pretende da-yos cobertura en banda ancho a 338.000 usuarios nuevos en más de 1.000 parroquies y pueblos, con una inversión de 9´4 millones d'euros que van financiase en parte gracies a una subvención de 1´4 M€ y otros 3´5 M€ en creéditu reembolsable.

Telefónica ye l'operador alxudicatariu prácticamente de la totalidá d'esta contrata, anque la empresa asturiana Telecable va llevar la infraestructura a la barriada de Riaño (Llangréu).Asina Telefónica va tener una subvención de 1.326.150 € y un créditu d'otros 3.182.760 € pa furnir de banda ancho a 1.008 parroquies nes que viven 332.919 persones, mientres que Telecable, que namás va facer el noyu de Riaño, tien subvención de 93.338 € y créditu de 351.946 €.

Tres d'esta iniciativa ta'l plan qu'anunciaren la Secretaría d'Estáu de Telecomunicaciones y pa la Sociedá de la Información (SETSI y el Principáu yá nel mes de marzu, cuando s'adelantó que según les cuentes de la SETSI y el Gobiernu asturianu había 83.749 domicilios asturianos que nun podíen entrar a internet pela banda ancho.L'obxetivu final d'esti plan ye que nel añu 2008 más de 2,5 millones d'habitantes del mediu rural en toa España tengan accesu al mesmu serviciu qu'agora ta llendáu a les ciudaes. El Ministeriu trabaya pa esti ambiciosu plan con un presupuestu de 146,3 millones d'euros a invertir nuna combinación de subvenciones y créditos ensin interés a diez años con trés de carencia.