El Gobiernu asturianu enfótase en caltener el Pautu de Gobiernu

La portavoz del Gobiernu asturianu Ana Rosa Migoya declaró ayeri na rueda de prensa de dempués del Conseyu de Gobiernu que l'executivu trabaya col enfotu de caltener el pautu que dende xunetu del 2003 caltién el gobiernu del país ente la FSA-PSOE y IX-BA.

La portavoz del Gobiernu asturianu remitióse a les últimes declaraciones de los dos secretarios xenerales de la FSA-PSOE Javier Fernández y d'Izquierda Xunida Jesús Iglesias pa esponer que'l pautu de Gobiernu va siguir alantre "en beneficiu de los intereses d'Asturies". IX-BA y PSOE van presentar güei un documentu de valoración conxuntu nel que les fuerces del pautu de gobiernu van facer balance del pasu del ecuador de la llexislatura.

Con too y con ello, esti pasu del ecuador llega tres d'una selmana d'acontecimientos contradictorios énte los que rescampla la francedura del pautu PSOE-IX a nivel local nel Conceyu de Mieres, pa la que la causa oficial foi la diferencia de criteriu ente dambes fuerces pol asitiamientu del hospital nuevu del conceyu. Mientres el socialista Javier Férnandez defendió esti divorciu políticu nel conceyu mierense, Izquierda Xunida llamentó la salida que tuvo'l procesu, acusando al PSOE d'abri-y les puertes de les cuenques al PP. La selmana anterior, les crítiques del Conseyeru de Xusticia Javier Valledor (IX) sobre la efectividá y rixu profesional del viceconseyeru d'Alministración Pública Luis Iturrioz (PSOE) tamién calecieren previamente l'ambiente.

Sicasí, nin l'asuntu Iturrioz nin la batalla de Mieres nun va ser torga pa que güei les partes del Gobiernu asturianu se presenten con argumentos pa siguir la so collaboración. Preba d'ello ye'l fechu de que mientres la Conseyera de Cultura y Portavoz del gobiernu Ana Rosa Migoya yá lo daba por fecho, la Presidencia d'Izquierda Xunida d'Asturies decidiere esti martes col 80 por cientu de los votos, da-y el preste a la continuidá del pautu de gobiernu.

En cuantes al conteníu dell documentu de valoración que va presentase güei, el Presidente asturianu Vicente Álvarez Areces adelantó esta selmana dello nel trescursu d'una entrevista a la Cadena SER. Según Areces, que nun quixo entrar a detalles, el tonu de la evaluación que va facese pública güei va ser "mui positivu".