El Gobiernu asturianu defende que Vidíu ta recuperándose

El Gobiernu asturianu dio a conocer güei datos sobre l'estáu de recuperación del fondu del Cabu Vidíu, onde va facer agora un añu que se fizo una saca de cerca de 500.000 metros cúbicos de sable pa rellenar con ello la playa de Salinas nun operación polémica que contaba con una subvención de la UE de 9 millones d'euros. La obra enfrentare nel so día al gobiernu autonómicu del PSOE, que s'oponía a ella col central del PP, qu'aneciaba en facela pero la opinión del executivu asturianu contraria a la obra entornó nos últimos meses del 2004, defendiendo l'executivu asturianu la necesidá de la obra contra'l criteriu de les cofradíes de pescadores de la redolada de Cuideiru, que víen peligrar con ello ún de los bancos de pesca de merluza y calamar más importantes del país.

Según la interpretación que fai la mesma Conseyería de Mediu Rural y Pesca sobre los datos que s'asoleyaron esta mañana y que pertenecen al Programa de Vixilancia Ambiental que ta llevando alantre la Dirección Xeneral de Costes del Ministeriu de Mediu Ambiente, pue sacase en conclusión que'l fondu marín del cabu Vidíu ta recuperándose y que'l llugar vuelve a ser un soporte pa la vida animal y vexetal.

Les campañes de control, que s'entamaron nel mes d'abril, tan mirando la calidá del agua y el nivel d'actividá biolóxica nel mediu, comparándose los resultaos colos de les mediciones del añu 1998, enantes de facese la draga. La conseyería de Pesca llama l'atención sobre'l fechu de que'l fondu presenta una bona cobertera de sable, en cuenta de tar la piedra a la vista, como se tenía mieu que pasare. Ello lleva a concluyir que la capacidá de xeneración de vida bentónica nel fondu nun presenta alteración nenguna. D'otra manera, en cuantes a la riqueza específica, o númberu d'especies distintes que tan presentes nel llugar, l'estudiu fala de la presencia de 38 especies contra les 26 del añu 98, anque se reconoz nello pue influyir el fechu de que les mediciones del 1998 correspuendan al mes de setiembre les del 2005 al d'abril. La conseyería rescampla tamién l'alta diversidá específica de les especies que s'alcuentren nel Cabu Vidíu.

En cuantes a los fondos de piedra, les muestres de bucéu permíten-y a la Conseyería falar d'una gran biodiversidá d'algues y otros organismos. Too ello lleva a la Conseyería a concluyir que'l Cabu Vidíu ta "recolonizándose satisfactoriamente" y que tien les mesmes condiciones no tocante a fauna de fondu que nel añu 1998.