El Gobiernu asturianu aprobó’l Plan Estratéxicu pa l’Agricultura Ecolóxico

El Conseyu de Gobiernu aprobó ayeri'l Plan Estratéxicu pa l'Agricultura Ecolóxico, un plan que se fai col envís de desarrollar esti sector al traviés de programes d'ayudes específiques p'agricultores ecolóxicos qu'entamen nel negociu y pa facer más amañosa la comercialización de los sos productos. El plan va desarrollase d'equí al 2009 y tien una financiación de 14,7 millones d'euros.

Ana Rosa Migoya, portavoz del Gobiernu, esplicó na ruda de prensa en que s'adelantó la noticia que'l Plan quier reconocer la importancia que tien la Producción Ecolóxico "en cuantes qu'agricultura sostenible que contribuye al caltenimientu del paisaxe y del mediu ambiente, y en cuantes que sistema que produz alimentos de calidá". Son oxetivos del Plan el desarrollu de la producción agrícola y ganadera, la tresformación y ellaboración de productos, la meyora de les condiciones de comercialización y venta, ganar a los consumidores al traviés de campañes específiques y meyorar la formación del sector, al empar qu'apautar mecanismos de control de calidá.

La investigación y desarrollu en materia de producción ecolóxica tamién va ser otru de los oxetivos del plan col qu'Asturies quier entrar, anque quiciás tarde, a un sector en plenu desarrollu que cuenta con 149.000 empreses certificadas como ecolóxiques o en fase de conversión a la producción ecolóxica en tola UE. En númberos comunitarios, esta agricultura respetuoso col mediu ambiente representa una superficie de 5.682.000 hectárees nel 2005, multiplicando por 57 la superficie acutada pa estes esplotaciones nel añu 1985. 733.000 d'estes hectárees asítiense en suelu español, unes cifres qu'asitien a España como ún de los estaos a la cola d'Europa nesti tipu d'esplotaciones. Dientro d'esti contestu, Asturies ye tamién una de les comunidaes onde menos desarrollada ta l'agricultura ecolóxico, y asina l'organismu certificador COPAE namás tien daos d'alta a 128 operadores, 94 d'ellos nel rexistru d'esplotaciones y 34 nel d'ellaboradores. La ganadería ecolóxico ye'l subsector más desarrolláu dientro d'esti negociu, con 24 ganaderíes de carne y otres 5 de lleche, mientres que'l Gobiernu reconoz el "allancamientu" del restu de producciones. De fechu, de les 2409 hectárees ecolóxques asturianes, 2.227 d'elles tán dedicaes a praos pa pación. Otres 7 esplotaciones correspuenden a abeyes pa miel ecolóxico y lo demás repártse ente productores de fruta, güerta, y ganadería menor.